Álemdegi eń baı adam Ilon Mask óziniń Tesla aksıalaryn satýǵa daıyn ekenin jáne álemdegi ashtyq máselesin sheshý úshin 6 mıllıard dollar jumsaıtynyn aıtty.

Mask Bul týraly BUU-nyń Dúnıejúzilik azyq-túlik baǵdarlamasynyń (WTF) dırektory Devıd Bıslıdiń tvıtterine bergen jaýabynda málim etti.

Bıslı óziniń tvıtterinde Ilon Mask baılyǵynyń 2%-y (6 mıllıard dollar) asharshylyqtan zardap shekken 42 mıllıon adamdy qutqarýǵa kómektesetinin jetkizgen.

Osydan keıin Mask tvıtterde 6 mıllıard dollar álemdegi ashtyqty sheshýge qalaı kómektesetinin surap, Tesla aksıalaryn dereý satyp, 6 mıllıard dollardy qarjylandyratynyn aıtty.

Mask artynsha, "biraq bul ashyq esep bolýy kerek, sondyqtan halyq aqshanyń qalaı jumsalatynyn naqty kóredi" dep qosty.

Degenmen zertteýshi, doktor Elı Devıd suraq qoıǵannan keıin, Bıslı 6 mıllıard dollar dúnıejúzindegi ashtyqty sheshpeıtinin, biraq "geosaıası turaqsyzdyqty, jappaı kóshi-qondy boldyrmaıdy jáne asharshylyq aldynda turǵan 42 mıllıon adamdy qutqaratynyn habarlady.

Bıslı Maskqa aqshanyń jumsalýy boıynsha "ashyq esep júıesi bar" ekenin aıtty.

– Sizdiń kómegińizben úmit syılaı alamyz, turaqtylyq ornata alamyz jáne bolashaqty ózgerte alamyz. Áńgimelesip kóreıik: bul "Falcon Heavy" (Mask óndiretin kosmostyq zymyran - red) sıaqty kúrdeli emes, – dedi Bıslı.