Shymkentte orta sapasy jáne baqylaý basqarmasy men Tótenshe jaǵdaılar departamentiniń ókilderi qaladaǵy gaz toltyrý beketteriniń basshylarymen kezdesip, avto gaz beketterinde gaz balondaryn toltyrý máselesin talqylady.

Búginde qalada kólikterge arnalǵan gaz beketterinde turmystyq gaz balondaryn toltyrý jaǵdaıy beleń alǵan. Mamandar beketterden quıylatyn suıyq gaz joǵary deńgeıde syǵymdalyp, jarylý qaýipi joǵary ekenin aıtýda.

Búginde qalada 4 gaz jınaqtaý stansıalary ornalasqan. Avto gaz quıý qyzmetimen aınalysatyn 20 zańdy tulǵalardyń menshiginde 94 gaz quıý stansıalary bar.

Orta sapasy jáne qalalyq baqylaý basqarmasynynń ókili Farhat Ýrkımbaev «Gaz jáne gazben jabdyqtaý týraly» Zańynyń 28-babyna sáıkes, gaz toltyrý pýnktteriniń ıeleri suıytylǵan gazdy turmystyq balondar arqyly satý úshin árbir tutynýshyny esepke alýy mindettelgenin aıtty.

Qazir gaz quıý beketterinde turmystyq balondar arnaıy qurylǵysyz toltyrylýda. Tipti, balondardyń jaramdylyǵy da tekserilmeıdi. Zań boıynsha gaz balondaryna avarıalyq jáne josparly qyzmet kórsetý mindettelgen. Bul jumystar árbir tutynýshymen júrgizilýi kerek. Búginde onyń eshqaısysy júzege asyrylmaı keledi.

–Sizder osy salada kópten jumys atqaryp kelesizder. Bilimdi mamandaryńyz ben tıisti jabdyqtaryńyz jáne múmkindikterińiz de jetkilikti. Talqylanyp otyrǵan ózekti máselege jaýapkershilikpen qarasańyzdar gaz balondarmen baılanysty oqys-oqıǵalardyń aldy alynar edi,-dedi F.Ýrkımbaev.

Jıynda TJ departamentiniń ókilderi baıandama jasap, qaýipsizdik talaptaryn saqtaý boıynsha gaz jelisi uıymdaryna birlesip jumys isteýge shaqyrdy.