Úshinshi megapolıstegi Ál-Farabı atyndaǵy qalalyq ǵylymı-ámbebap kitaphanada erekshe is-shara ótti. Shymkent qalalyq mádenıet, tilderdi damytý jáne arhıvter basqarmasy uıymdastyrǵan «Night quest» saıahatyna jańalyqqa jany qumar jastar, oqyrmandar men qala turǵyndary qatysty.

Kitaphana ujymy osylaısha jastardy zamanaýı kvest oıyny arqyly jańǵyrǵan, jańarǵan Ál-Farabı kitaphanasymen tanystyrýdy maqsat tutyp otyr.

Kreatıvti formatta ótken is-sharaǵa qatysýshylar Ál-Farabıdiń shákirti Kallıgraf pen kitaphana shyraqshysy – Dárýishtiń, Shyǵys arýynyń bastaýymen kvesttiń ár kezeńinde túrli tapsyrmalar oryndady. Mysaly, sahnalyq kórinister, sandyqtan qoljazbalar izdeý, ǵulamanyń shyǵarmasynan úzindilerdi tabý arqyly kelesi kezeńge ótip otyrdy. «BOOKparty» barysynda vıktorınaǵa qatysyp, pikir almasty.

– Kitaphanamyzdyń ataýy ózgerip qana qoımaı, ishi de, mazmuny da Ál-Farabı álemine saı bezendirilip, jańartyldy. Bul jumystar qala ákimi Murat Dúısenbekuly Áıtenovtyń tikeleı tapsyrmasymen atqarylýda. Osylaısha jastarǵa, qala turǵyndaryna álem tanyǵan ustazdyń rýhanı, ǵylymı murasyn nasıhattap kelemiz. Byltyr Ál-Farabıdiń 1150 jyldyǵyna oraı halyqaralyq ǵylymı konferensıalar ótti. Alda osyndaı formattaǵy is-sharalardy jalǵastyrý josparymyzda bar, – dedi Ál-Farabı kitaphanasy dırektorynyń mindetin atqarýshy Gúlmıra Alpysbaeva.

Budan keıin bıblıokafede ádebıettiń túrli janry boıynsha kitaptar usynyldy. Sonymen qatar, kópshilik túngi kınoseansta «Ábý Nasyr Ál-Farabı» anımasıalyq fılmin tamashalady.