1 qazan kúni tańerteń Oregona shtatynyń ońtústik-batysynda ornalasqan Umpqua Community kolejinde qyrǵyn atystyń nátıjesinde 10 adam qaza taýyp, 7 adam jaraqat alǵan. Bul týraly «Qamshy» portaly nbcnews.com-ǵa silteme jasaı otyryp habarlaıdy.  Atysty shyǵarǵan búlikshi óz qurbandaryn óltirmes buryn olardyń dinı nanym-senimi týraly aqparat talap etken kórinedi. 
Búlik shyǵarǵan adam Dýglas okrýgy ókilderimen bolǵan atysta qaza tapty dep málimdedi sherıf Djon Hanlın. Kóptegen quqyq qorǵaý organdary onyń tulǵasyn anyqtapty. Qylmysker 26 jastaǵy Krıs Harper Merser bolyp shyqty. Biraq, sherıf Djon Hanlınniń aıtýynsha, mundaı soraqy áreketke barǵan adamnyń atyn shyǵarýdyń qajeti joq.

«Bizdiń taraptan endigi rette onyń esimin estimeıtin bolasyzdar, atyn ataýǵa ol tipti laıyq emes», - dedi Hanlın beısenbi kúni jasaǵan málimdemesinde.

Shtattyń bas prokýrory Ellen Rozenblúm jáne ózge de resmı tulǵalar eń alǵashqy baıandamalarynda Roýzbýrg aımaǵynda bolǵan oqıǵa nátıjesinde 13 adam qaza tapty dep aıtqan bolatyn. Biraq tergeý jumysynyń barysynda, bul aqparattyń qate ekeni anyqtaldy. «Mynadaı qorqynyshty jaǵdaıdyń aıasynda, bir adamdy birneshe ret sanap jibergen bolýymyz kerek», - dep pikir bildirdi qateleskender.

«Qazirgi tańda 10 adamnyń qaza tapqany jónindegi aqparat eń naqty ekenine senim bildirýlerińizdi suranamyz», - dedi Hanlın myrza.

Quqyq qorǵaý organdarynyń aıtýynsha, oqıǵa ornynan 4 qarý tabyldy: 3 tapansha jáne AR-stılindegi zeńbirek.

«Biz úshin bul óte uzaq ári óte qasiretti kún boldy. Biraq, kóptiń eńsesi qulamas úshin bizdiń bekem bolýymyz kerek», - dedi kolejdiń ýaqytsha prezıdenti Rıta Kanvın jýrnalıserge bergen suhbatynda.

Al AQSH prezıdenti Barak Obama qoǵamda qarýdyń keń taralǵanyna kóńilsizdik bildirýde. «Dál myna jaǵdaıda jaı ǵana duǵa qylý jetkiliksiz, iske kóshý kerek», - dep pikir bildirdi.

Nazgúl Nazar