Almaty áýejaıy júk tasymaldaý qyzmetiniń burynǵy qyzmetkerleri óz erkimen jumystan ketý týraly aryz jazýǵa májbúr bolǵandaryn aıtyp shaǵymdandy, dep habarlady KTK arnasy.

Almaty áýejaıy júk tasymaldaý qyzmeti qyzmetkerleri biriniń aıtýynsha, jumystan shyǵarý týraly sheshim olar úshin kútpegen jaǵdaı bolǵan.

– Bizge kadr bóliminen qońyraý shalyp, barlyǵymyzdy shaqyryp aldy. Biz 7 adam edik, bárimizdi birdeı shaqyrdy. Kadr bólimine kelgen kezde bizdiń óz erkimizben ketkenimiz jónindegi mór basylǵan eńbek kitapshalarymyz ben jumystan bosatý týraly buıryq daıyn turdy. Biz qujattarǵa "Bizdi qandaı negizde bosatyp jatyr?" degen suraqpen qol qoıdyq, al olar bizge "Senderge eshkim kómektese almaıdy. Óz jumys oryndaryńdy bosatýlaryń qajet dep jaýap berdi, – deıdi jumysshylardyń biri Galına Takobaeva.

Onyń sózinshe, kadr bóliminde olardy óz erkimen ketýden bas tartsa, "arnaıy bappen jumystan qýamyz" dep qorqytqan. Al áýejaı basshylyǵy qyzmetkerlerdi jumystan shyǵarýǵa májbúrlegenin joqqa shyǵarady.

– Almaty halyqaralyq áýejaıynyń burynǵy jumysshylary "Almaty halyqaralyq áýejaıy" AQ-ǵa qatysty aıyptaýlary negizsiz ekenin habarlaımyz. Olar óz bastamalary boıynsha jumystan bosatyldy jáne Qazaqstan Eńbek kodeksiniń 49-baby 5-tarmaqshasy boıynsha eńbek kelisimsharty buzyldy, – dedi "Almaty halyqaralyq áýejaıy" AQ baspasóz qyzmetiniń jetekshisi Naılá Jabagına.

Soǵan qaramastan bir mezette birneshe jumysshynyń qyzmetten bosatylýy kúdik týdyryp otyr. Áýejaıdyń burynǵy qyzmetkerleri olardyń kóbi bul nysanda 10 jyldan astam ýaqyttan beri eńbektenip kele jatqanyn aıtty. Barlyǵynyń avıasıa salasynda bilimi bar. Keıbiri tipti zeınetke shyǵatyn jasqa jetip qalǵan.

"Óz erkimen jumystan bosatylǵandar" qaıta jumysqa qabyldaýdy nemese basqa jumys ornyn usynýdy talap etip otyr. Jumyssyz qalǵandar osy máseleniń aq-qarasyn anyqtaý úshin Avıasıalyq kólik prokýratýrasyna shaǵymdanǵan.