Májilis Qazaqstan táýelsizdiginiń 30 jyldyǵyna baılanysty raqymshylyq jasaý týraly zań jobasyn maquldady. Zań jobasyn İshki ister mınıstri Erjan Turǵymbaev tanystyrdy.

Mınıstrdiń málimetinshe, raqymshylyq onsha aýyr emes jáne aýyrlyǵy ortasha qylmys úshin jazadan bosatýdy, keıbir aýyr, asa aýyr qylmystar úshin jaza merzimin qysqartýdy kózdeıdi. Raqymshylyq ardagerlerge, kámeletke tolmaǵandarǵa, jasy úlkenderge, İ jáne İİ toptaǵy múgedekterge, sondaı-aq ishki ister mınıstrligi "qoǵamǵa qaýip tóndirmeıdi" dep tapqan adamdarǵa qoldanylady.

Turǵymbaev el boıynsha 64 mekeme, 16 tergeý ızolátorynda 34 myń adam bar ekenin, olardyń ishinde 30 myń azamatqa sot úkimi shyqqanyn, 4 myń adam tergelip jatqanyn aıtty. Onyń 93 paıyzy aýyr jáne asa aýyr qylmys jasaǵany úshin qamaýda otyr. 32 myń adam probasıalyq baqylaýda.

Raqymshylyq aksıasyna saı, 2236 sottalýshyǵa, 11310 probasıada turǵan adamǵa amnıstıa jasalady. Onyń ishinde 1000 adam qamaýdan shyǵady, 3818 adam probasıalyq baqylaýdan bosatylady. 1294 sottalýshyǵa, 7492 probasıada turǵan adamǵa jaza merzimi qysqartylady.

Sondaı-aq sotqa deıingi tergeý óndirisindegi 5 myń qylmystyq is qysqartylady. Onyń ishinde 1674 adam qylmystyq jaýapkershilikten bosatylady. 1471 adamǵa sot organdary jaza merzimin qysqartady nemese bosatý sharasyn qoldanady.

Qylmystyq kodekstiń 78-babyna saı asa aýyr qylmys jazaǵan adamdarǵa raqymshylyq qoldanylmaıdy.