AQSH prezıdenti Djo Baıden Qytaı men Reseı basshylaryn "COP26" klımattyq samıtine kelmegeni úshin synǵa aldy. Bul týraly BBC habarlady.

Seısenbi kúni keshke sóılegen sózinde Baıden klımat taqyryby úlken másele ekenin aıtyp, Qytaı bul máselede "teris qarap ketti", "úlken qatelik jasady" dedi. Baıden Beıjiń "Reseı jáne Pýtınmen birdeı" jumys istegenin aıtty.

"Qytaı álemdik kóshbasshy retinde álemde jańa rólin bekitýge tyrysyp jatqany túsinikti, biraq munda kelmedi" degen Baıden Sı Szınpınniń bolmaýy "úlken qatelik" dep qosty.

Reseı prezıdenti Vladımır Pýtın de, Qytaı basshysy Sı Szınpın de Ulybrıtanıanyń Glazgo qalasynda ótip jatqan samıtke kelmegen.

Eki el de kelissózderge tek delegasıalaryn jiberdi. Samıt eki aptaǵa jalǵasyp, 14 qarashaǵa deıin jalǵasady.

Kómirqyshqyl gazyn aýaǵa shyǵarýda dúnıe júzi boıynsha Qytaı birinshi orynda, odan keıin AQSH turady. Reseı EO men Úndistannan keıingi besinshi orynda.

Shotlandıanyń eń úlken qalasynda ótken konferensıaǵa 120-dan astam kóshbasshy qatysty.

Elder 2030 jylǵa qaraı aýadaǵy kómirqyshqyl gazy deńgeıin tómendetýge, sondaı-aq sol jylǵa deıin ormandardy otaýdy toqtatýǵa jáne qaıta orman ósirýge ýáde berip, kelisip jatyr. Sonymen qatar ózge de iri kelisimderdi jarıalady.

Qytaı da, Reseı de ormandardy otaýdy toqtatý týraly ýádege qol qoıǵan elder. Kreml pres-relızine sáıkes, Baıdenniń sózinen buryn Pýtın seısenbi kúni "COP26" samıtinde ormandy basqarý jónindegi keńeste sóz sóılep, Reseı orman alqaptaryn saqtaý úshin "eń kúshti jáne eń nátıjeli sharalardy" qoldanyp jatqanyn aıtty.

Aıta keteıik, buǵan deıin Ulybrıtanıada ǵalamdyq klımat samıti ótip jatqany jáne samıtte AQSH prezıdenti Djo Baıdenniń álem elderinen keshirim suraǵany habarlanǵan.