Osy jyldyń toǵyz aıy ishinde Aqtóbe oblysyna 558 mlrd. teńge ınvestısıa tartyldy. Bul respýblıka boıynsha eń joǵary kórsetkishterdiń biri.

«Óńirler arasynda alǵashqy bestiktemiz. Naqtylap aıtsaq tórtinshi oryndy ıemdenip otyrmyz. Investısıa tartý óńirimizdiń damýyna qosymsha serpin beredi. Osyǵan baılanysty oblysta qolaıly ınvestısıalyq klımat qurý boıynsha belsendi jumystar júrgizilýde. Al, jyl sońyna deıin 800 mlrd. teńgeden astam ınvestısıa tartýdy josparlaýdamyz. Onyń alǵysharttary jasaldy»,- dedi Aqtóbe oblysynyń ákimi Ońdasyn Orazalın Ortalyq komýnıkasıalar qyzmetinde ótken baspasóz máslıhatynda.

Investısıalyq jobalardyń ishindegi irileri – «Aktobe TES» AQ-nyń jylý-elektr ortalyǵyn jańǵyrtý jobasy, quny 20 mlrd. teńge; «West Smart Trading» JSHS-niń quny 13,8 mlrd. teńge bolatyn málimetterdi óńdeý ortalyǵy, «Gas Processing Company» JSHS-niń quny 5,4 mlrd. ​ teńge bolatyn gazdy keshendi daıyndaıtyn qondyrǵyny qalpyna keltirý jumystary.

Shaǵyn jáne orta bıznes salasynyń damýynda da oń dınamıka baıqalady.

«Prezıdent óz Joldaýynda pandemıa kezinde bıznesti qoldaý sharalary óziniń tıimdiligin dáleldegenin atap ótip, osy baǵdarlamalardy odan ári de jalǵastyrýdy tapsyrdy. Jalpy Aqtóbe oblysynda kásipkerlikti damytýǵa erekshe kóńil bólinýde. 9 aıdyń qorytyndysy boıynsha 2,5 myńnan astam shaǵyn orta bıznes jobalary qoldaý tapty. Bul ótken jylmen salystyrǵanda 2 ese kóp»,- deıdi O.Orazalın.

Jyl sońyna deıin shaǵyn jáne orta bıznestiń 3,3 myńdaı sýbektisin memlekettik qoldaý sharalarymen qamtý josparlanyp otyr.