Qazaqstanda joǵary oqý oryndarynyń 19 dısertasıalyq keńesi belgilengen talaptardy saqtamaǵandyqtan 2021 jyly óz qyzmetin toqtatty, dep habarlady bilim jáne ǵylym mınıstrligi. 

Qazirgi ýaqytta ýnıversıtetterde taǵy 13 dısertasıalyq keńes jabylý aldynda tur. 

– Keńester qurylǵan doktorantýranyń keıbir bilim berý baǵdarlamalary akredıtteýden ótpegen. Birqatar ýnıversıtette keńestiń turaqty quramy bekitilmegen ári keńes quramynda 50% ýaqytsha múshelerdiń bolýy jónindegi talaptar saqtalmaǵan. Birqatar dısertasıalyq keńeste resmı resenzentterdiń, dısertasıalyq keńes músheleriniń ǵylymı jumysty baǵalaýy formaldy sıpatqa ıe jáne jumys mazmunyna egjeı-tegjeıli taldaý júrgizilmeıdi, – dedi bilim jáne ǵylym salasynda sapany qamtamasyz etý komıtetiniń tóraıymy Gúlzat Kóbenova.

Sonymen qatar, osy jyldyń naýryz aıynda dısertasıalyq keńesterdiń jumys isteýi boıynsha jańa talaptar belgilengen. Olardyń ishinde dısertasıalyq keńesterde ýaqytsha múshelerdiń – qorǵalatyn dısertasıa taqyryby boıynsha sala mamandarynyń bolýy, resenzentterdiń daýys berýge qatysýy jáne olarǵa qatysty shekteýler týraly erejeler bar.