Prezıdent Qasym-Jomart Toqaev damý áleýeti tómen monoqalalardan qonys aýdarýshylar úshin jeńildetilgen ıpoteka baǵdarlamasyn ashýdy tapsyrdy. 

– "Otbasy bankte" mundaı azamattar úshin jeńildetilgen ıpoteka baǵdarlamasyn qarastyrǵan jón. Bastapqy jarna – 10%, syıaqy mólsherlemesi – 2-den 5%-ke deıin. Úkimet ákimdiktermen birlesip atalǵan bastamany jan-jaqty pysyqtaýy qajet, –  dedi Toqaev Ekibastuzda monoqalalardy damytý jónindegi keńeste.

Prezıdent memlekettik turǵyn úı saıasaty aıasynda damý áleýeti tómen monoqalalardan kóshetin adamdarǵa jeke bólim arnaý kerektigin atap ótti. 

– Osylaısha biz bul azamattardy perspektıvasy bar, damyǵan, mamandarǵa muqtaj qalalarǵa óz erkimen qonys aýdarýǵa yntalandyramyz. Ónerkásiptik monoqala turǵyndarynyń kóbi bilikti, suranysqa ıe jumysshy jáne ınjenerlik mamandyqtarda tájirıbesi bar ekenin jaqsy bilemiz, – dedi Toqaev.

Onyń sózinshe, monoqalalardyń ekonomıkasyn ártaraptandyrýda jáne shaǵyn jáne orta bıznesti damytýda jańa óndiris oryndaryn qurý jobalary mańyzdy ról atqarady. Úkimet 20 myń jumys ornyn qurýmen quny 2 trıllıon teńgege 79 jobany iske asyryp jatyr.