Qazaqstanda múgedektik sebebine qaramastan I toptaǵy múgedekke kútim kórsetetinderge jańa járdemaqy tólenedi. Bul týraly Eńbek jáne halyqty áleýmettik qorǵaý mınıstrliginiń baspasóz qyzmeti habarlady.

"Qazaqstannyń keıbir zańnamalyq aktilerine azamattardyń jekelegen sanattaryn áleýmettik qorǵaý máseleleri boıynsha ózgerister men tolyqtyrýlar engizý týraly" zańyna sáıkes, Qazaqstanda múgedektik sebebine qaramastan, I top múgedegine kútim jasaıtyn adamdarǵa eń tómengi kúnkóris deńgeıiniń 1,4 mólsherinde (2021 jyly – 48 023 teńge) járdemaqy engizildi.

Múgedektik boıynsha járdemaqyny kimder alady

I toptaǵy múgedekke kútim jasaıtyn adamdar osy járdemaqyny alý úshin "Azamattarǵa arnalǵan úkimet" memlekettik korporasıasynyń bólimshelerine ótinish berýi kerek. Ótinishpen birge mynadaı qujattar qosa tapsyrylady:

• jeke basyn kýálandyratyn qujat (jeke kýálik, qandas kýáligi, azamattyǵy joq adamnyń kýáligi, sheteldiktiń turýǵa yqtıarhaty nemese sıfrlyq qujattar servısinen elektrondy qujat);
• I toptaǵy múgedekke qorǵanshylyq (qamqorshylyq) belgilengenin rastaıtyn qujat (ondaı derek bolǵan jaǵdaıda);
• kútimge muqtaj adamnyń múgedektigi týraly anyqtama;
• járdemaqy berý jónindegi ýákiletti uıymdaǵy bank shotynyń nómiri týraly málimetterdi rastaıtyn qujat, sáıkestendirý úshin qajet;
• psıhıkalyq densaýlyq ortalyǵynda esepte turmaıtyny týraly anyqtama.

Budan basqa, kútimdi júzege asyrýshy retinde aıqyndalǵan adamnyń is-áreketke qabilettiligi týraly málimetter jeke basyn kýálandyratyn qujat boıynsha ádilet mınıstrliginiń "Jeke tulǵalardyń memlekettik derekqory" aqparattyq júıesinde tekseriledi.