Facebook Efıopıa premer-mınıstri Abıı Ahmedtiń jazbasyn óshirip tastady. Kompanıa bul áreketin "ol zorlyq-zombylyqqa qarsy áleýmettik jeli saıasatyn buzdy" dep túsindirdi.

Efıopıa premer-mınıstri azamattardy qarý alýǵa shaqyrǵan. Aqparatqa sáıkes ol "Tıgreı Halyqty Azat etý Maıdany"(THAM) dep atalatyn kóterilisshilerdiń alǵa jyljýyna tosqaýyl qoıý úshin post jarıalaǵan.

Kóterilisshiler sońǵy kúnderi negizgi qalalardy basyp alyp, úkimet kúshterine qarsy bir jyl boıy kúres júrgizdi.

Keıbir akkaýnttardyń zorlyq-zombylyqty taratý úshin Facebook-ty qoldanýy jıi synalady. Kompanıa osyndaı jaǵdaılardy toqtatý úshin ónimdi jumys isteı almaǵandyqtan aıyptaýlarǵa tap boldy.

Bas kompanıasy Meta dep ózgertilgen Facebook ókili "Biz Efıopıa premer-mınıstriniń jazbasy týraly habardar boldyq jáne  zorlyq-zombylyqty qozdyrýǵa, qoldaýǵa qarsy saıasatymyzdy buzǵany úshin postty óshirip tastadyq. Meta-da (bireý) qaýymdastyq standarttaryn buzsa, jeke tulǵalardyń nemese uıymdardyń kim ekenine qaramastan, jazbany alyp tastaımyz" dep málimdedi.

Ótken aıda Facebook kompanıasynyń ishki qujattary jappaı jarıalandy. Onda Efıopıadaǵy qarýly toptar etnıkalyq azshylyqtarǵa zorlyq-zombylyq jasaý úshin, sondaı aqparattardy taratý úshin Facebook platformasyn paıdalanyp jatqany anyqtaldy.

Qazan aıynda AQSH Senatynda sóılegen Frensıs Haýgen kompanıa AQSH-tan tys jerlerde óz qyzmet saıasattaryn durys júrgizbegendikten Efıopıa sıaqty qaqtyǵys aımaqtarynda "etnıkalyq zorlyq-zombylyqty týdyrýda" dep málimdedi.

Birikken Ulttar Uıymynyń málimeti boıynsha, Efıopıadaǵy qaqtyǵystardan myńdaǵan adam qaza tapqan, mıllıondaǵan adam bosqynǵa aınalyp, júzdegen myń adam asharshylyq jaǵdaıyna tap boldy.

Soǵys ótken jyldyń 4 qarashasynda Efıopıanyń premer-mınıstri Abı Tıgraıdaǵy aımaqtyq kúshterge qarsy áskerı shabýyl jasaýǵa buıryq bergen kezde bastaldy.

THAM terorıstik uıym dep tanyldy, biraq uıym ózderin Tıgreıdiń zańdy úkimeti ekenin aıtady.

Aıta keteıik, jaqynda ǵana Facebook óziniń korporatıvtik ataýyn "Meta" dep ózgertti.

Keıbir sarapshylar Sýkerbergtyń bul qadamy nazardy Facebook-tyń aınalasyndaǵy jaǵymsyz oqıǵalardan basqa jaqqa aýdarý ekenin aıtady.