Búgin «Rýhanı jańǵyrý» qazaqstandyq qoǵamdyq damý ınstıtýtynyń uıymdastyrýymen «Ulttyq rýhanı jańǵyrý» ulttyq jobasynyń baǵyttary jáne iske asyrý tetikterin túsindirý boıynsha onlaın formatta semınar ótti.

Semınarǵa elimizdiń barlyq óńirleriniń İshki saıasat basqarmasynyń basshylary jáne «Rýhanı jańǵyrý» óńirlik jobalyq keńseleriniń basshy, qyzmetkerleri qatysty.

Onlaın kezdesýde jobanyń baǵyty, maqsaty, mindetteri jáne iske asyrý tetikteri tanystyryldy. Ulttyq jobanyń birinshi baǵyty «Rýhanı jańǵyrý» qundylyqtaryn ilgeriletý jáne memlekettik tildi damytý» baǵyty. Bul baǵyt boıynsha 38 is-shara, 8 kórsetkish kózdelgen. Ekinshi «El Rýhy» baǵyty – mádenıet salasynda qoljetimdilik pen sapany arttyrý, 13 is-shara men 5 kórsetkishke jetý josparlanǵan. Úshinshi «Táýelsizdik urpaqtary» baǵyty. Bul – jastar úshin jańa múmkindikter ashý jáne olardy qoǵamdyq paıdaly isterge tartý mindetterin qamtıdy.

Aıta keteıik, «Ulttyq rýhanı jańǵyrý» jobasy – Aqparat jáne qoǵamdyq damý, Mádenıet jáne sport jáne Bilim jáne ǵylym mınıstrlikterimen júzege asyrylady. Jobanyń negizgi maqsaty – Ulttyq kodty saqtap, mádenı biregeılikti jańǵyrtý, ulttyq qundylyqtar men salt dástúrdi nasıhattaý arqyly- qoǵamnyń mádenı dengeıin, talǵamyn jáne rýhyn kóterý.