Italıa soty sońǵy onjyldyqtardaǵy eń iri mafıa sotynyń birinshi kezeńinde "Ndrangeta" degen iri mafıalyq toptyń 70 múshesine úkim shyǵardy.

Aıyptalýshylarǵa kisi óltirýge oqtalý jáne bopsalaý sıaqty aıyptar taǵyldy.

Aldaǵy eki jylda 355 mafıa jáne jemqor sheneýnik Italıanyń eń baı jáne eń kúshti uıymdasqan qylmystyq tobyna qatysy bar degen aıyppen sot aldynda jaýap beredi.

Proseske júzdegen advokat pen myńǵa jýyq kýáger tartylǵan.

Sot prosesteri Lamezıa Terme qalasyndaǵy arnaıy ózgertilgen sot zalynda jabyq esik jaǵdaıynda ótti.

Sýdıalar aıyptalǵandardyń altaýyn 20 jylǵa bas bostandyǵynan aıyrdy. 

"Ndrangeta" shamamen 150 otbasynan turatyn keń taralǵan qylmystyq jeli.

Uzaqqa sozylǵan aıyptaý paraǵynda esirtki, kisi óltirý, adam óltirýge oqtalý, bopsalaý, nesıe alý, qyzmettik qupıany jarıa etý jáne qyzmettik ókilettigin asyra paıdalaný boıynsha aıyptar bar.

Tergeýge prokýror Nıkola Gratterı jetekshilik etken. Ol Italıanyń mafıaǵa qarsy eń qurmetti bas prokýrorlarynyń biri. Gratterı ondaǵan jyldaryn ıtalályq qylmystyq toptarmen kúresýge jumsap, sonyń saldarynan 30 jyldan astam polısıanyń qorǵaýynda ómir súrgen.

Gratterı osy jyldyń basynda halyqty alańdatqan "Ndrangetany" joıýǵa ýáde berip, jýrnalıserge úkimniń "óte jaqsy ótkenin" aıtqan.

"Ndrangeta" keń aýqymdy zańsyz árekettermen aınalysady. Top kokaın saýdasyna mamandanǵan ári Eýropadaǵy saýdanyń 80%-ǵa jýyǵyn baqylaıdy dep sanalady.