Twitter-degi saýalnamada daýys berýshiler Ilon Maskty salyq tóleý úshin Tesla-daǵy úlesiniń 10 paıyzyn satýǵa shaqyrdy.

Mask senbide bastaǵan saýalnamaǵa úsh jarym mıllıonnan astam Twitter paıdalanýshysy daýys berdi, shamamen olardyń 58%-y aksıany satýdy qoldady.

Ol saýalnama arqyly óz ıeligindegi 21 mıllıard dollarǵa jýyq aksıany satý nemese satpaý sheshimin shyǵarmaq.

Mask AQSH demokrattary usynǵan "mıllıarderlerge salynatyn salyqqa" jaýap retinde osylaı istep otyr.

Biraq álemdegi eń baı adamdardyń biri Mask óz úlesin qalaı jáne qashan satatyny týraly áli ashyq túrde túsinikteme bergen joq.

Eger Mask aksıasyn satatyn bolsa, úlken salyq shotyna túsýi múmkin.

İri aksıalardy ıelikten shyǵarý kezinde keıbir basshylar ınsaıderlik saýdaǵa qatysty aıyptaýlardy boldyrmaý úshin satýdy uzaq ýaqyt boıy taratyp, "soqyr" dep atalatyn satý baǵdarlamalaryn paıdalanady.

Mask tvıtterinde óziniń eshbir kompanıasynan jalaqy nemese bonýs almaǵanyn aıtty, ıaǵnı onyń tabys salyǵyn tóleıtindeı tabysy joq.

Biraq ol ótemaqy paketi arqyly mıllıardtaǵan dollar tapty. Ótemaqy paketi kompanıa ónimdilik maqsattaryna jetkende jáne onyń aksıalary belgili bir baǵaǵa jetkende aksıalardyń úlken kólemin paıdalanýǵa múmkindik beredi.

AQSH Senatyndaǵy demokratıalyq partıa usynǵan josparlarǵa sáıkes, mıllıarderler aksıalarynyń baǵasy kóterilgen kezde, tipti olar aksıalarynyń eshqaısysyn satpasa da, "iske alynbaǵan tabystarǵa" salyq salynýy múmkin.

Aktıvterdiń satylǵan-satylmaǵanyna qaramastan, qun ósimine salynatyn salyq AQSH-taǵy 700-ge jýyq mıllıarderge áser etýi múmkin dep sanalady. Synshylar aktıvterdiń quny árqashan kóterile bermeıtinin atap ótti.

Al, Masktyń Twitter-degi saýalnamasy qarjy áleminde qorqynysh týdyrdy.

AQSH Berklı ekonomısi Gabrıel Zýkman Twitter-de "Álemdegi eń baı adamnyń salyq tóleýi Twitter saýalnamasyna táýeldi emes kúndi asyǵa kútemiz" dep jazdy.

Venchýrlyq ınvestor Chamat Palıhapıtıa "Biz Twitter-degi saýalnamaǵa qatysqan adamdardyń 25 mıllıard dollarlyq moneta aınalymynyń nátıjesin sheshetinine kýá bolyp otyrmyz" dep jazdy.

63 mıllıonǵa jýyq jazylýshysy bar Mask Twitter jelisindegi eń tanymal bıznes kóshbasshylardyń biri.

Ol platformany ózi ıelenetin Tesla, SpaceX jáne Neuralink kompanıalarynyń jańalyqtaryn bólisý úshin únemi paıdalanady.

Biraq Masktyń keıbir jazbalary buǵan deıin daý týdyrǵan. Tipti ol sotta jaýap berip, ondaǵan mıllıon dollar aıyppul tólegen.