Bala otbasyn buzylmas qorǵanyndaı kóredi. "Baqytty otbasy" degende onyń kóz aldyna áke-sheshesiniń erkeletkeni, botam dep baýyryna basqany keledi. Alaıda, "Baqytty otbasy" rolıginiń aıtpaǵy basqa.

Elimizde ýshyqqan máseleniń biri – balaǵa alıment tóleýden jaltarý. 2021 jylǵy 1 mamyrdaǵy statısıka boıynsha alıment tólemeı júrgender sany 220 785 adamǵa jetken. Onyń 97%-y er adamdar.

Bir shańyraq astynda ómir súrýge bel býyp, ómirge sábı ákelgen ár otbasy bala aldynda úlken jaýapkershilik arqalaıdy. Ókinishke qaraı, elimizde ár úshinshi otbasy ajyrasyp jatyr. Áke-sheshesi eki jaqqa ketken bala kóbine anasymen qalady. Al, ákesi alıment tóleý mindetin moınyna alady. Bala ákesimen qalǵan jaǵdaıda, anasy alıment tóleýge tıis.

"Alıment tóleýden jaltarýshy jaq" kóbine alıment tólemeý úshin kásibin týystarynyń atyna jazdyryp, kirisin jasyrady ári bala ómirine múlde aralaspaıdy.

Zań boıynsha alıment tóleýden jaltarǵandarǵa ártúrli qatal sharalar qoldanylady. Shetelge shyǵý quqyǵynan aıyrylady, dúnıe-múlki men shottary buǵattalady, kólik júrgizý quqyǵy da shekteledi.

Eń qatty degeni  Qazaqstan Respýblıkasy Qylmystyq kodeksiniń 139-babyna sáıkes, sot 600 saǵatqa qoǵamdyq jumysqa, eki jylǵa bas bostandyǵynan aıyrýǵa jaza taǵaıyndalýy múmkin.