Men,  tili basqa bolsa da tilegi bir, júzi basqa bolsa da júregi bir, qazaqstandyq koreı otbasynda tárbelenip ósken qarapaıym azamatpyn.

Búginde Shymkent qalasyndaǵy №88 JOBB mektepte dene shynyqtyrý pániniń muǵalimimin.

Qalalyq koreı etnomádenı birlestigi janyndaǵy jastar qanatynyń múshesimin.

Shardarada týylyp, Jetisaıda jetildim, Shymkentte  shyńdaldym.

Aýylda óskennen bolar, qazaq tilin jetik meńgerdim, qazaqı tárbıe aldym.

Qazaq tilin bilgenimniń arqasynda, qazaqtyń kórkem ádebıetine, onyń ishinde Abaı atamyzdyń shyǵarmalaryna degen qyzyǵýshylyǵym, meni bir talaı jetistikterge shyǵardy. Ómirime mán berip, qaıta qaraýǵa yqpal etti.  Máselen, Hákim Abaı Qunabaıulynyń: «Birińdi qazaq, biriń dos, kórmeseń istiń bári bos», degen sózi, bir qaraǵanda jattandy sóz tirkesi retinde kóriner. Biraq onyń túbine úńilgen adam, biraz dúnıeni ańǵarady. Qaı kezde de ózektiligin joımaǵan hakim Abaıdyń bul sózi qazirgi bizdiń qoǵamdy sıpattap turǵandaı áser qaldyrady. Eldegi barlyq etnostar memleket quraýshy qazaqtyń mańaıyna toptasyńdar, búginińdi, bolashaǵyńdy qazaqpen baılanystyr dep otyr.

Odan bólinip kete almaısyń. Sebebi seniń týǵan jeriń, kindik qanyń tamǵan jeriń – Qazaqstan. Sondyqtan osynda turatyn báriń bir-birińmen dos, baýyr bolyp, tatý-tátti ǵumyr keshińder. Birlik bolmaı tirlikteriniń nátıjeli bolmaıdy, dep turǵandaı seziledi.

Birqatar baıqaýlarda baǵymdy synadym. Syılyq, marapat úshin emes, Abaı atamyzǵa degen qurmetim, qyzyǵýshylyǵym soǵan ıtermeledi.  Byltyr hakimniń 175 jyldyǵyna oraı etnos jastary arasynda ótken respýblıkalyq baıqaýda bas júldeger atandym.

Sózdiń qysqasy, «Adamzattyń bárin súı baýyrym dep...» degen ilimdi Abaı atamyzdan úırendim. Bilim alý, izdenis pen til bilýdiń paıdasyn uǵyndym.

Aıtaıyn degenim, tilge, elge qurmet – shynaıy yqylas pen izgi nıetten, aqedil peıilden týady.

Ózim qazaqtyń jıeni ári kúıeý balasy retinde «Jigittiń jaqsy bolýy naǵashydan» degen sózdiń shyndyǵyna talaı kóz jetkizdim.

Men kezinde Qazaqstanda kúshtep qonys aýdarylǵan koreılerdiń 4-shi urpaǵymyn. Óz basym bolashaǵymdy Qazaqstanmen bekem baılanystyryp, belin bekem býǵan jas býynnyń ókilimin. Ákem aıtpaqshy, osynda jatqan ata-babamnyń súıegin tastap eshqaıda ketpeımin. Sebebi,  bar qazaqqa ortaq qazaq jeri – meniń elim, meniń jerim, meniń Otanym!

 Men Táýelsizdik qurdasymyn! Bıyl 30-ǵa tolamyn.

Alda mejelegen talaı joba-josparymdy iske asyryp, elime paıdamdy tıgizsem degen oıym bar. Abaı atamyzdyń 37-shi qara sózinde: «Óziń úshin eńbek qylsań, ózi úshin ottaǵan haıýannyń biri bolasyń, adamdyqtyń qaryzy úshin eńbek qylsań, Allanyń súıgen qulynyń biri bolasyń», deıdi. Sondyqtan barsha zamandastarymdy el ıgiligi úshin eńbek etýge, Táýelsiz Qazaqstannyń abyroıyn asqaqtatý baǵytynda jumys isteýge shaqyramyn! Ol úshin bizge shynaıy nıet, tynymsyz eńbek jáne uzaǵyraq ýaqyt kerek.

Ár adamda bir ǵana Otan bolady. Meniń Otanym – Qazaqstan! Men osy jerde, dál osy altyn topyraqta týǵanyma maqtanamyn! Ózimdi baqytty sanaımyn!

Búginde barshamyz el erteńi úshin bilim alyp, eńbek etip jatqan jaıymyz bar. Táýelsizdik týyn qolda berik te bekem ustaý Qazaqstandy óz Otanym dep sanaıtyn árbir qazaqstandyqtyń eń basty boryshy, eń bıik muraty. Elimizdiń eńseli kók Týy kók aspanda jelbireı bersin! Elimizdiń mereı toıy qutty bolsyn!

Pak Temýr Andreevıch,

Shymkent qalalyq koreı etnomádenı birlestigi janyndaǵy jastar qanatynyń múshesi