Qaladaǵy №1 aýrýhana bazasynda dárigerler ınsýlt alǵan 69 jastaǵy naýqastyń mı qan tamyryn mıhrohırrýgıalyq ádispen tigip berdi. Shymkentte alǵash ret jasalǵan otany elimizdiń úzdik neırohırýrgi Erkin Medetov jasady.

Naýqas atalǵan arýrýhanaǵa jedel járdem qyzmetimen jetkizilgen. Insýlt alǵan naýqasty dárigerler angıografıalyq ádispen tekserip, qan tamyryndaǵy aqaýdy anyqtaǵan. Pasıenttiń ómirin aman alyp qalý úshin dárigerler shuǵyl túrde ony ota zalyna kirgizip, mı qantamyrana hırýrgıalyq em jasady.

–Tekserý kezinde naýqastyń shat tamyry arqyly enip, mı qan tamyrlaryn tekserdik. Tekserýdiń nátıjesinde mı qan tamyrynyń bitelgenin anyqtadyq. Mıdyń sol aımaǵyna qannyń jetispeýshiligine baılanysty jańadan tamyr tigý qajet boldy. Sondyqtan osy operasıany jasadyq. Bul otanyń maqsaty mıdyń qan jetpeı turǵan aımaǵyna aınalma jol arqyly qan jetkizý,-deıdi neırohırýrg Erkin Jumaǵalıuly.

Naýqas qazir óziniń jaǵdaıy jaqsy ekenin, dárigerlerge, osyndaı úlken múmkindik bergen memlekettik qoldaýǵa alǵysyn aıtyp otyr.

«Ákem úshin qatty ýaıymdadyq. Mundaı operasıa qalamyzda jasalatynyn bilmedik. Ákemniń jaǵdaıy qazir jaqsy. Dárigerlerge taǵy da raqmet» deıdi naýqastyń uly Qaırat Ákenov.

Aıta ketý kerek, mundaı operasıa 10 myń dollarǵa baǵalanady. Alaıda mindetti áleýmettik medısınalyq saqtandyrý kezinde qalanyń medısınalyq mekemelerinde hırýrgıalyq emdeý tegin kórsetiledi.

Memleket basshysynyń tapsyrmasy aıasynda joǵary bilikti medısınalyq kómekti damytýǵa erekshe kóńil bólinedi. Densaýlyq saqtaý salasyndaǵy memlekettik saıasatty júzege asyrýda bıyl eki ınsýlt ortalyǵy ashyldy. Budan basqa, qalalyq búdjetten medısınalyq mekemelerdiń materıaldyq-tehnıkalyq bazasyn jaraqtandyrýǵa 6,5 mlrd.teńge bólindi.

Shymkenttegi ınsýltpen aýyratyn naýqastardy emdeýge jatqyzýdy taldaý kezinde pasıentterdiń tek 7% ǵana ózin-ózi emdeý arqyly stasıonarǵa túsetini jáne jedel medısınalyq kómek jelisi boıynsha 87% , pasıentterdiń 5% emhanalar jelisi boıynsha túsetini jáne qalǵan 1% basqalaı jolmen stasıonarǵa túsetini anyqtaldy. Sondyqtan dárigerler aýrýdy órshitip almaý úshin emhanalarǵa ýaqytynda baryp, em qabyldaý kerek ekenin eskertedi.