Almatyda qazir saýda oryndaryna jumys kúnderi "jasyl" statýsy bar adamdar ǵana kiredi degen talap joq, alaıda qala dárigerleri Nur-Sultandaǵy epıdemıologıalyq jaǵdaıdy baqylaıdy. Bul týraly qalanyń bas sanıtar dárigeri Jandarbek Bekshın málimdedi.

Nur-Sultannyń bas sanıtar dárigeriniń jańa qaýlysyna sáıkes, 15 qarashadan bastap saýda jáne oıyn-saýyq ortalyqtaryna jumys jáne demalys kúnderi tek "jasyl" statýs alǵan adamdar ǵana kire alady.

Almatynyń bas sanıtar dárigeri eń aldymen Nur-Sultandaǵy epıdemıologıalyq jaǵdaıdy baqylaıtynyn jetkizdi.

– Nur-Sultanda osyndaı qaýly shyqty. Bul uzaq ýaqyt talqylandy. Saýda jáne oıyn-saýyq ortalyǵyna tek "jasyl" statýsy bar adamdardy kirgizýdi pılottyq sheshim dep ataýǵa bolady. Eger ol jaqsy nátıje kórsetse, árıne ári qaraı eldiń basqa óńirlerinde de engiziledi. Birneshe apta baqylaımyz, – dep jaýap berdi Bekshın.

Qazir Almatyda koronavırýsqa baılanysty epıdemıologıalyq jaǵdaı turaqtanyp jatyr. Qala qazir koronavırýstyń taralýy boıynsha "sary" aımaqta tur. Qalada ujymdyq ımýnıtet 56%-dy quraıdy.

Búgin qalada Pfizer vaksınasyn salý bastaldy, al revaksınasıa 22 qarashada bastalady.

Ótken aptada ınfeksıa anyqtalǵan naýqastardyń 29%-y saýda oryndarynda, 21%-y qoǵamdyq kólikte, 22%-y otbasyda, 9%-y bazarda, 9%-y jumys ornynda juqtyrǵan.