Elbasy Nursultan Nazarbaev Nur Otan partıasy Tóraǵasy laýazymyn Prezıdent Qasym-Jomart Toqaevqa tapsyrýǵa sheshim qabyldady. Osyǵan baılanysty partıa Tóraǵasynyń birinshi orynbasary Baýyrjan Baıbek eksklúzıvti pikir bildirdi, dep jazady  Azattyq Ruhy saıty.

Qasym-Jomart Kemeluly «Nur Otan» qurylǵannan bastap onyń basy-qasynda. Uzaq ýaqyt partıanyń basqarýshy jáne mańyzdy sheshimder qabyldaýshy organy – Saıası Keńes Búrosynyń múshesi bolyp tabylady.

2019 jyly Prezıdent laýazymyna kandıdat retinde Qasym-Jomart Kemeluly osy «Nur Otan»-nan usynyldy. Sońǵy parlament saılaýynda partıa Memleket basshysy ózi jarıa etken saılaýaldy baǵdarlamamen aıqyn jeńiske jetti. Sol berilgen ýádelerdi oryndaý – bıleýshi partıanyń qazirgi ýaqyttaǵy basty mindeti, – dep atap ótti Baýyrjan Baıbek.

Onyń aıtýynsha, qazir «Nur Otan» qoǵamdy Prezıdentimizdiń Memlekettik baǵdary tóńiregine toptastyrýy qajet.

«Bul sheshim el ishindegi jáne syrtyndaǵy barlyq taraptarǵa bıliktiń tutastyǵyn jáne onyń sabaqtastyq saıasatyna tolyqtaı berik ekendigin kórsetedi. Qosarlanǵan bılik týraly aıtylǵan barlyq negizsiz pikirler men orynsyz uıǵarymdardy teriske shyǵaratyn qadam.

Elbasynyń el úshin jáne bıleýshi partıa úshin osyndaı mańyzdy sheshimdi Táýelsizdigimizdiń 30 jyldyǵynda qabyldaýy úlken sımvoldyq mánge ıe dep bilemin», – dedi partıa Tóraǵasynyń birinshi orynbasary.