12 qarasha, juma kúni Aqtóbe oblysynyń ákimi Ońdasyn Orazalın Qobda aýdanyna jumys saparymen bardy. I.Biltabanov atyndaǵy aýylda óńir basshysy jańa dárigerlik ambýlatorıany qarap shyǵyp, materıaldyq-tehnıkalyq jaraqtanýymen tanysty, qyzmetkerlerimen jáne emdelýshilermen tildesti.
Jańa ǵımarattyń jalpy aýmaǵy - 320 m2. Onyń qurylysyna memleket 78,5 mıllıon teńge bólgen. Jumysty «Stroıneft» JSHS merdiger mekemesi oryndady. Ambýlatorıa 1500-den asa aýyl turǵynyna qyzmet kórsetedi. Eski ǵımarattyń salynǵanyna 50 jyldan asqan ári apatty jaǵdaıda boldy.
I.Biltabanov atyndaǵy aýyl – áleýmettik jáne ınjenerlik ınfraqurylymy «Aýyl - El besigi» baǵdarlamasy boıynsha jańǵyrtylǵan eldi mekenderdiń biri.
Atalmysh baǵdarlama aıasynda bıyl jol jóndelip, uzyndyǵy 1,5 shaqyrym bolatyn Astana kóshesi jaryqtandy. Sondaı-aq, mádenıet úıi kúrdeli jóndeldi. Shatyry, terezeleri, jylý jáne elektr jelileri aýystyryldy, mańaıyndaǵy jerler abattandyryldy. Bir aptadan soń jańartylǵan mádenıet úıinde aýyl turǵyndaryna arnap konsert qoıylady. Osy jyly aýylda sondaı-aq, jańa sporttyq jáne balalar alańdary paıda boldy, jaryn gúl baǵy men jaıaýjol salý, kireberis jáne aýylishilik joldardy jóndeý josparda bar.
«Aýyldyq jerge osylaı kóńil bólgenińizge alǵys aıtqym keledi. Qazir aýylymyzǵa jan bitti – sý bar, gaz bar, jol bar, klýb, aýrýhana, mektep bar! Kóshe jaryǵy qalanikinen jaqsyraq. Tek qýanyp, ómir súr»,- deıdi oblys ákimimen áńgimelesken aýyl turǵyny Aleksandr Pırogov.
Ońdasyn Orazalın: «Bul memleket basshysynyń aýyl turǵyndarynda da qalalyqtardikindeı ıgilikter bolsyn degen tikeleı tapsyrmasy, biraq sizderde taza aýa, taza sý sıaqty artyqshylyqtar bar. Bizdiń oblystyń aýyldaryn abattandyrý jumystary jalǵasyn tabady»,- dep jaýap berdi.
Qobdada óńir basshysy qulpynaı ósiretin jylyjaıǵa bardy. Alańy 540 m2 bolatyn jylyjaı bıyl sáýir aıynda paıdalanýǵa berilgen. Qazir munda úshinshi egin orylyp jatyr.
«Ázirge bir eginnen 300 keliden alyp jatyrmyz, ári qaraı 1,5 tonnaǵa jetedi dep josparlap otyrmyz»,- deıdi jylyjaı ıesi Táttibek Ámirǵalıev. Jobaǵa quıylǵan ınvestısıa - 8 mln teńge. Ónim dúken sórelerine jańa pisken jáne muzdatylǵan kúıinde jetkiziledi.
Aýdan ortalyǵynda oblys ákimi sondaı-aq, «Aýyl el besigi» baǵdarlamasy aıasynda jóndelgen uzyndyǵy 1271 jáne 2100 metr bolatyn I.Biltabanov jáne aǵaıyndy Kópjasarovtar kóshelerin qarap shyqty.
Jumys sapary Taldysaı aýyldyq okrýginde aıaqtaldy. Ol jaqta óńir basshysy Abat Baıtaq kesenesiniń qalpyna keltirý jumystarymen tanysty. Munda kesene men shyraqshy úıi jóndelip, elektr jelileri men sý qubyry júrgizildi, mańaıy abattandyryldy. Qazirgi tańda qorym aýmaǵynda eski qulyptastardy qalpyna keltirý jumystary jalǵasýda.
«Qulyptastar jartylaı buzylǵan, 260-tan astam qulyptas HİH ǵasyrǵa jatady. Sonymen qatar, 8-ge jýyq qorǵan bar, olardyń jasy 2,5 myń jyl. Kesene 14 ǵasyrǵa jatady »,- deıdi tarıhshy-ólketanýshy Bekarystan Myrzabekov.
Jumys saparynyń sońynda oblys ákimi tarıhı-mádenı mura nysandaryn saqtaý jáne dáripteý sharalaryn ári qaraı júzege asyrý boıynsha birqatar tapsyrmalar berdi.
Aqtóbe oblysy ákiminiń baspasóz qyzmeti
