İshki ister mınıstrligi qylmystyq atqarý júıesi komıteti (QAJK) tóraǵasynyń orynbasary Meıram Aıýbaev 18 jyl túrmede otyrǵan aqyn, dıssıdent, oppozısıoner Aron Atabektiń ólimine qatysty pikir bildirdi. Aqparatty Azattyq  radıosy saıty málimdedi.

– Aron Edigeev 2019 jyldan bastap barlyq medısınalyq tekserýden bas tartty. Keıingi kezde aryqtaı bastaǵany baıqaldy. Jyl basynan beri Ulttyq prevententıvti mehanızm, qoǵamdyq baqylaý komısıasy ókilderin, syrttan dárigerler shaqyrdyq. Olar da dárigerge qaralýdyń mańyzdy ekenin túsindirdi. Týystaryna da aıttyq. Dárigerge qaralý, qaralmaý kez-kelgen adamnyń konstıtýsıalyq quqyǵy. Dárigerge qaralýǵa zorǵa kelisti. 22 qyrkúıekte Pavlodar qalasynyń N1 aýrýhanasyna jatqyzylyp, dıagnozdary anyqtaldy. 1 qazanda Pavlodar qalasynyń sot sheshimimen jaza merzimi qysqartylyp, bosatyldy. Sol kúni ápkesi keldi. Medısına qyzmetkerimen birge Almatydaǵy úıine deıin jetkizildi, – dedi Meıram Aıýbaev.

Aron Atabek 24 qarashada saǵat keshki 8 shamasynda qaıtys bolǵan. 26 qarasha kúni halyq dıssıdentti aqtyq saparǵa shyǵaryp saldy. Marqumnyń múrdesi Baǵanashyl zıratyna qoıylady.

Bıyl 1 qazanda Pavlodar soty 2006 jylǵy Shańyraq oqıǵasynan keıin 18 jylǵa sottalǵan Aron Atabektiń qalǵan jaza merzimin bostandyǵyn shekteý jazasyna aýystyryp, aqyndy "densaýlyq jaǵdaıyna baılanysty" túrmeden shyǵarǵan. Aqyn buǵan qarsylyq tanytyp, ózin tolyq aqtaýdy talap etken.

5 qazan kúni belsendiniń jaǵdaıy kúrt nasharlap, aýrýhanaǵa shuǵyl jetkizilgen. Keıin Atabektiń aýrýhanaǵa jatýdan bas tartqany belgili boldy. Artynsha ol úıinde jasandy tynys alý apparatymen demalyp jatqany habarlandy.

Artynsha Aron Atabektiń densaýlyǵy nasharlap komaǵa túskeni, jeke klınıkada jatqany habarlanǵan. Uzamaı beti beri qaraǵany týraly aqparat shyqqan.

Aron Atabek 15 jyldan astam ýaqyt túrmede otyrdy. Ol 2006 jylǵy "Shańyraq" oqıǵasynan keıin 18 jylǵa sottalǵan. Sot Atabekti "Shańyraq" oqıǵasy kezinde qaza tapqan polısıa qyzmetkeriniń ólimine aıypty dep tanyǵan.

Keı belsendiler aqynnyń túrmeden bosatylýyn "bılik Aron túrmede ólip qaldy dep jaman atty bolmas úshin bosatty" dep túsindiredi.