Aqtóbede oblys ákimi Ońdasyn Orazalınniń tóraǵalyǵymen memleket basshysy Qasym-Jomart Toqaevtyń "Halyq birligi jáne júıeli reformalar – el órkendeýiniń berik negizi" atty joldaýynyń júzege asyrylýyna baılanysty jıyn ótti, dep habarlady Aqtóbe oblysy ákiminiń baspasóz qyzmeti.

Jıynǵa oblystyq memlekettik organdardyń basshylary, oblystyq qoǵamdyq keńes ókilderi, ardagerler qatysty.

Ońdasyn Orazalın jıyndy asharda: «Aldyńǵy kúni memleket basshysy jyl saıynǵy Qazaqstan halqyna joldaýymen sóz sóıledi. Prezıdent elimiz úshin ózekti bolyp tabylatyn barlyq suraqty qamtydy. Negizgi mindetterdiń biri – pandemıadan keıingi kezeńde ekonomıkalyq ósimdi qamtamasyz etý» – dep atap ótti.

Oblys ákimi strategıalyq qujattyń negizgi basymdyqtary men memleket basshysy qoıǵan aýqymdy mindetterdi iske asyrý joldaryna toqtaldy.

Prezıdent tapsyrmasyn oryndaý maqsatynda óńirde COVID-19-ǵa qarsy ekpe týraly jalǵan aqparatpen kúres jumystary kúsheıtiletin bolady. Aıta keteıik, búginde koronavırýsqa qarsy ekpeniń birinshi komponentimen 285 myń adam, ekinshisimen 228 myńnan asa adam egilgen. Sondaı-aq, búdjet qarajatyn tıimdi paıdalaný, aýyl aýmaqtaryn damytý jáne halyqtyń qatysý búdjetin engizý, kvazımemlekettik sektor kásiporyndaryn jekeshelendirý, shaǵyn jáne orta bıznestiń damýyn jedeldetý, bilim berý salasyn damytý jáne t.b. syndy mindetter qoıyldy.

Prezıdenttiń azamattardyń ál-aýqatyn jaqsartý boıynsha tapsyrmasy aıasynda 2022 jyldyń 1 qańtarynan bastap eń tómen eńbekaqy mólsheri 42500 teńgeden 60 myń teńgege deıin ósedi.

Oblys ákiminiń birinshi orynbasary Rýslan Hambarovtyń aıtýynsha atalmysh shara tabysyn joǵaltýyna baılanysty, sonyń ishinde bir jasqa deıingi bala kútimine baılanysty áleýmettik tólem alǵan azamattarǵa tikeleı qatysty bolady.

Buqaralyq jáne balalar sportymen shuǵyldanýǵa jaǵdaı jasaý jumystary jandandyrylady. Búginde oblys turǵyndarynyń 32,24%-y dene shynyqtyrýmen jáne sportpen aınalysady. Qazirgi tańda Qarǵaly, Temir aýdandarynyń aýyldaryndaǵy jáne Hromtaý men Qandyaǵash qalalaryndaǵy 5 dene shynyqtyrý-saýyqtyrý kesheniniń qurylysy jalǵasýda. Budan ózge, bıyl múmkindigi shekteýli jandarǵa arnalǵan sport keshenin jáne Jarqamys, Jarly jáne Jaǵabulaq aýyldarynda angar tıpindegi 3 sport keshenin salý josparlanyp otyr. «Samuryq-Qazyna-Trasttiń» qoldaýymen Muǵaljar aýdanynyń Embi qalasyndaǵy BJSM janynan dene shynyqtyrý-saýyqtyrý keshenin salý bastaldy. Sonymen qatar, Aqtóbe qalasyndaǵy ortalyq stadıon men «Hımık» stadıonyn qalpyna keltirý úshin jobalyq-smetalyq qujattama túzetilip jatyr. Tek qalany ǵana emes, oblystaǵy barlyq iri aýyldardy sport ǵımarattarymen qamtý josparda bar.

Sıfrlandyrýdy damytý aıasynda oblys ortalyǵynda 79 aparattyq-baǵdarlamalyq keshen men 2600 syrtqy beıne baqylaý kameralaryn ornata otyra «Aqtóbe qaýipsiz qala» izdestirý-saraptaý keshenin engizý josparlanýda. Bul shara turǵyndardyń qaýipsizdigin kóterýge, óńirdegi apat pen qylmys deńgeıin azaıtýǵa múmkindik beredi.

Aıta ketý kerek, búginde 250 adamnan asatyn turǵyny bar eldi mekenderdi ınternetpen qamtý aıasynda, óńirdegi 100 aýyldyń 98-i «3G» mobıldik ınternetimen qamtylǵan, qalǵan eki aýyl boıynsha jumystar júrgizilýde.

Ońdasyn Orazalın oblys Memleket basshysynyń jyl saıynǵy joldaýynda qoıylǵan maqsat-mindetterdi oryndaý úshin bar kúshin salatynyn atap ótti.

«Ol úshin bizde barlyq jaǵdaı bar. Tek qatań baqylaýdy qamtamasyz ete otyryp, berilip, jaýapkershilikpen jumys isteý kerek»,- dedi oblys ákimi qaramaǵyndaǵylarǵa.