Májilis Spıkeri Nurlan Nyǵmatýlınniń tóraǵalyǵymen ótken jalpy otyrysta  depýtattar «Qazaqstan Respýblıkasynyń bıologıalyq qaýipsizdigi týraly» zań jobasyn birinshi oqylymda maquldady.

– Elimizdiń zańnamalyq tarıhynda alǵash ret «Bıologıalyq qaýipsizdik» týraly zań jobasyn qabyldadyq. Bul zań joba Memleket Basshysy Qasym-Jomart Kemeluly Toqaevtyń tapsyrmasymen ázirlengen. Osy qujat elimizde bıoqaýipsizdikti qamtamasyz etýge arnalǵan. Ol ártúrli ınfeksıalardyń aldyn alýǵa, halyqtyń densaýlyǵyn saqtaýǵa, jalpy alǵanda, qorshaǵan ortany bıologıalyq qaýipterden qorǵaýǵa múmkindik beredi, – dedi Nurlan Nyǵmatýlın.

Palata Spıkeri atap ótkendeı, bul zań jobasy Qazaqstanda bıologıalyq qaýipsizdikti qamtamasyz etýdiń jańa modelin qurý úshin quqyqtyq negiz bolady jáne azamattar men qorshaǵan ortany qorǵaýǵa baǵyttalady. Osy zań jobasy bıologıalyq qaýipsizdik salasyndaǵy memlekettik saıasatty iske asyrýdyń biryńǵaı júıesin qalyptastyrýǵa, memlekettik organdardyń ókilettikterin naqty ajyratýǵa jáne olardyń qyzmetin úılestirýge múmkindik beredi.

Sonymen qatar, depýtattar osy zań jobasyn talqylaý barysynda bıologıalyq qaýipsizdik salasyndaǵy biryńǵaı memlekettik aqparattyq júıe derekteri máselelerine erekshe nazar aýdardy. Atap aıtqanda, memlekettik aqparattyq júıelerdi zańdy tulǵalardyń, onyń ishinde jeke tulǵalardyń aqparattyq júıelerimen ıntegrasıalaý kezinde týyndaýy múmkin mańyzdy aqparattyń jarıa etilýi nemese joǵalyp ketýine qatysty máselelerdi kóterdi.

Májilis Spıkeri atap ótkendeı, aqparattyq júıelerdi biriktirgennen keıin derekter qoryna qol jetkize alatyn barlyq uıymdar qoljetimdiligi shekteýli júıeni engizýi tıis.

Osy rette, Nurlan Nyǵmatýlın Densaýlyq saqtaý mınıstrine bıologıalyq qaýipsizdik salasyndaǵy Biryńǵaı memlekettik aqparattyq júıeni qurý barysyn jeke baqylaýǵa alý qajettigin aıtty.

Májilistiń baspasóz qyzmeti