Ulybrıtanıada ornalasqan beıresmı trıbýnal Qytaıdyń Shyńjańdaǵy uıǵyr, qazaq sıaqty azshylyqtarǵa genosıd jasap jatqanyn málimdedi.

Trıbýnal beısenbi kúngi qorytyndyǵa kelýiniń basty sebebi retinde Beıjińniń Shyńjańdaǵy musylman azshylyqtardyń týýyn  baqylaýy jáne sterılızasıa sıaqty sharalaryn atady.

Trıbýnal tyńdaýlaryna tóraǵalyq etken tanymal brıtandyq advokat ser Djeffrı Nıstiń aıtýynsha, onyń alqasy Qytaıdyń "etnıkalyq azshylyqtardyń sanyn uzaq merzimdi qysqartý" úshin "ádeıi, júıeli jáne kelisilgen saıasat" júrgizgenin anyqtaǵan. Ol Shyńjań aımaǵyndaǵy musylman azshylyqtaryna jasalǵan qıanat úshin joǵary laýazymdy tulǵalar, sonyń ishinde Qytaı tóraǵasy Sı Szınpındi de "negizgi jaýapkershilikte" dep sanaıtynyn aıtty.

Trıbýnal alqasy zańgerler men ǵalymdardan quralǵan. Onyń qorytyndysynyń zańdy kúshi joq jáne Ulybrıtanıa mınıstrleri úshin mindetti emes, biraq ony uıymdastyrýshylar Qytaıǵa qarsy aıyptaýlarǵa qatysty dáleldemelerdi qosyp, genosıd máselesi boıynsha táýelsiz qorytyndy jasaýǵa nıetti ekenin aıtty.

Qytaı úkimeti Shyńjańdaǵy adam quqyqtary buzyldy degen barlyq aıyptaýlardy joqqa shyǵarady. Beısenbi kúni trıbýnaldyń sheshimine jaýap bergen Qytaıdyń baspasóz hatshysy BBC-ge bul organ "jalǵan trıbýnal" dep málimdedi. Sonymen qatar ol "Qytaıǵa qarsy elementter halyqty aldaý jáne adastyrý úshin qoldanatyn saıası qural" ekenin aıtty.