IDF Eurasia kredıt uıymy nesıe alýda qazaqstandyqtardyń qandaı toby qıyndyqqa tap bolatyny týraly zertteý qorytyndysyn jarıalady. Zertteý kórsetkendeı, aılyq eńbekaqysy 300 myń teńgeden bastalatyn ózin-ózi jumyspen qamtyǵandar sanatyndaǵy azamattardyń 50 paıyzyna kredıtke ótinish bergende teris jaýap kelgen.

Zertteýge 12 myń adam qatysqan. Onyń 60 paıyzy ózin-ózi jumyspen qamtyǵandar.

Uıym keltirgen derekke saı, 2021 jyly ózin-ózi jumyspen qamtýshylardyń 52 paıyzy bankterge kredıt alýǵa ótinish bildirgen. Olardyń jartysyna bank bas tartqan. Suralǵandar bank mundaı sanattaǵy azamattardy "senimsiz qaryz alýshy" dep sanaıtynyn jetkizgen.

Dese de bul sanattaǵy azamattardyń eńbekaqysy ortashadan joǵary bolyp keledi. Máselen, zertteýge qatysqan ózin-ózi jumyspen qamtýshylardyń 53 paıyzy 300 myń teńge kóleminde jalaqy alatynyn aıtsa, 17 paıyzy 500 myń, 20 paıyzy 600 myń teńgeden joǵary tabatynyn jetkizgen. 

Qazaqstandyqtardyń 75 paıyzy bank nesıe ótinishin qarastyrǵanda ózin-ózi jumyspen qamtýshylarǵa resmı jumys istemeıtindikten bas tartady degen pikirde. 15 paıyzy ózin-ózi jumyspen qamtý statýsynda kredıt tarıhynyń bolmaýymen baılanystyrsa, 10 paıyzy mundaı sanatqa baǵyttalǵan arnaıy kredıt ónimi qarastyrylmaǵanymen túsindiredi.

Bıznes maqsattaǵy kredıtter ózin-ózi jumyspen qamtýshylardyń tek 10 paıyzyna berilgen. 40 paıyzy tutynýshylyq nesıe alsa, 12 paıyzyna ǵana ıpoteka resimdelgen. 25 paıyzy múlkin kepilge qoıyp baryp kredıt ala alǵan.