– Úlken kenti eń yńǵaıly jer, ulttyq elektr jeliler topografıasy turǵysynan tıimdi alań bolyp sanalady. Ol jerde 500 kılovolttyq tarmaqtalǵan jeliler bar, Ońtústik-GRESS 500 qosalqy stansıasy da ornalasqan. Al bazalyq qýat kózderin ornalastyrýdyń arqasynda Soltústik-Ońtústik baǵytynda elektr energıasynyń turaqty tranzıtin jasaýǵa bolady. Ortalyq Qazaqstanǵa – Qaraǵandyǵa da, Soltústik-Ońtústik tranzıtimen ońtústik óńirlerge de energıany qaıta bólýge yńǵaıly, – dedi Satqalıev jýrnalıserge bergen suhbatynda dep jazady Sputnik Qazaqstan basylymy.

Onyń aıtýynsha, qazirgi kezde atom elektr stansıasyna qajetti qural-jabdyqtardy shyǵaratyn kásiporyndardan birneshe usynys túsken.

– Reseı, Qytaı men Fransıadan, sonymen qatar amerıkalyq óndirýshilerden eki usynys tústi. Biz sheshim qabyldaǵanda tehnologıalardyń qaýipsizdigin, sonyń negizinde qansha atom reaktorlary salyndy, baǵasy jáne taǵy basqa máselelerdi eskeretin bolamyz. AES-ke qajetti otyndy Qazaqstanda shyǵarý jaıyn da qaraımyz, – dedi qor basshysy.

Qazaqstanda birneshe jyldan beri atom elektr stansıasyn salý ıdeıasy kóterilip keledi. Energetıkter AES qajettiligin energetıkalyq tapshylyqpen túsindiredi. Prezıdent Q.Toqaev bıylǵy joldaýynda 2030 jyldarǵa qaraı Qazaqstanda elektr energıasynyń tapshylyǵy bolatynyn aıtqan.

Alaıda qoǵamda AES salýǵa qarsy kóńil-kúı basym. Arys qalasy, Jambyl oblysyndaǵy áskerı qoımalarda bolǵan jarylystan keıin AES salý ıdeıasyna degen teris kózqaras arta túsken. Azamattar arasynda eki jylda eki birdeı joıqyn jarylysqa jol berip qoıǵan úkimettiń áreketine kúmánmen qaraıtyndar basym. "AES salyp, sońy úlken qaıǵyly jaǵdaıǵa uryndyryp júrmesine kim kepil" degen mazmundaǵy pikirler jıi aıtylady.