​Bilim jáne ǵylym mınıstri Asqat Aımaǵambetov pedagogterdi jumysqa qabyldaýdyń jańa erejelerin túsindirdi. Bul týraly ol áleýmettik jelidegi paraqshasynda málimdedi.

Mınıstrdiń aıtýynsha, endi pedagogterdi jumysqa qabyldaý jańa formatta konkýrs jáne naqty krıterııler boıynsha júzege asyrylatyn bolady.

– Ózgerister muǵalimderdi jumysqa ornalastyrý kezinde ashyqtyqty qamtamasyz etýge, sybaılas jemqorlyq táýekelderin joıýǵa jáne jumysqa qabyldaý kezinde merıtokratıa qaǵıdalaryn qamtamasyz etýge baǵyttalǵan. Buǵan deıin naqty ereje bolǵan joq, ıaǵnı mektep dırektory kimdi jáne qandaı kórsetkishter boıynsha jumysqa qabyldaý kerektigi týraly ózi sheshetin, – dedi ol.

Ol birqatar aımaqta saǵattar sany durys bólinbeı, úsh-tórt muǵalim bir stavkaǵa qabyldanǵan jaǵdaılar da tirkelgenin atap ótti.

Budan bylaı bilim berý uıymdary barlyq bos nemese ýaqytsha bos laýazymdarǵa konkýrs ótkizetin bolady. Bul shaǵyn jınaqty mektepterge qatysty emes.

Baıqaýǵa biliktilik sıpattamalaryna sáıkes keletin muǵalimder qatysady.

– Jumysqa ornalasý kezinde úmitker konkýrsqa qatysý týraly ótinish beredi. Ótinish berýshi óziniń baǵalaý paraǵyn qosa usynady. Onda barlyq jetistigi, nátıjeleri, eńbek ótili, ákimshilik nemese ádistemelik qyzmet tájirıbesi, kýrstyq daıyndyq jáne basqa da aqparat kórsetiledi. Árbir baǵyt boıynsha kandıdat belgilengen krıterııler arqyly baǵalaý shkalasyna sáıkes óz balyn derbes qoıady.

Konkýrstyq komısıa ótinish berýshiniń ózi qoıǵan baldyń, olardy rastaıtyn qujattardyń sáıkestigin tekserip, qorytyndy upaı shyǵarady. Nátıjesinde bos orynǵa eń kóp bal jınaǵan úmitker qabyldanady. Sýbektıvızm deńgeıi barynsha tómendeıdi, – dedi mınıstr Asqat Aımaǵambetov.