Strategıalyq josparlaý jáne reformalar agenttiginiń tóraǵasy Qaırat Kelimbetov Qazaqstan yqtımaldy atom elektr stansıasy qurylysyna baılanysty kelissóz bastaǵanyn, kelissóz júrgizýshiler arasynda reseılik "Rosatom" korporasıasy da baryn aıtty. Bul týraly ol reseılik Kommersant basylymyna berge suhbat barysynda málim etti.
Kelimbetov Qazaqstan kómirtektik energıa úlesin tómendetip, 2060 jylǵa deıin kómirtekti beıtaraptyqqa qol jetkizýge tıis ekenin aıta kele atom elektr stansıasyn salýdyń qajettigin atap ótti.
– Biz Glazno kelisimine saı 2030 jylǵa deıin kómir qyshqyl gazy bólinýin 15 paıyzǵa tómendetýimiz kerek. Ol úshin kún men jel energıasyna qosymsha ınvestısıa tartý qajet. Alaıda bul kómirdi tolyq almastyra almaıdy. Keı jaǵdaıda gaz da qajet. Biraq Qazaqstanǵa atom elektr stansıasyn salýǵa týra keletin shyǵar. Biz kelissózderge kirisip kettik. Onyń arasynda "Rosatom" da bar. Qysqasy dekarbonızasıa – kómirden bas tartý ǵana emes, dekarbonızasıa energetıkalyq modeldiń eski turinen jańasyna ótýdi bildiredi, – dedi ol.
Buǵan deıin "Samuryq-Qazyna" ulttyq ál-aýqat qorynyń basqarma tóraǵasy Almasadam Satqalıev atom elektr stansıasyn salýǵa yńǵaıly oryn retinde Almaty oblysy Jambyl aýdanyna qaraıtyn Balqash kóliniń ońtústik-batys bóligindegi Úlken kenti belgilenip otyrǵanyn habarlaǵan.
Sondaı-aq ol atom elektr stansıasyna qajetti qural-jabdyqtardy shyǵaratyn kásiporyndardan, atap aıtqanda Reseı, Qytaı men Fransıadan, AQSH elderi óndirýshilerinen usynystar túskenin, sheshim qabyldaǵanda tehnologıalardyń qaýipsizdigi, sonyń negizinde qansha atom reaktorlary salyndy, baǵasy jáne taǵy basqa máseleler eskeriletinin jetkizgen.
Qazaqstanda birneshe jyldan beri atom elektr stansıasyn salý ıdeıasy kóterilip keledi. Energetıkter AES qajettiligin energetıkalyq tapshylyqpen túsindiredi. Prezıdent Q.Toqaev bıylǵy joldaýynda 2030 jyldarǵa qaraı Qazaqstanda elektr energıasynyń tapshylyǵy bolatynyn aıtqan.
Alaıda qoǵamda AES salýǵa qarsy kóńil-kúı basym. Arys qalasy, Jambyl oblysyndaǵy áskerı qoımalarda bolǵan jarylystan keıin AES salý ıdeıasyna degen teris kózqaras arta túsken. Azamattar arasynda eki jylda eki birdeı joıqyn jarylysqa jol berip qoıǵan úkimettiń áreketine kúmánmen qaraıtyndar basym. "AES salyp, sońy úlken qaıǵyly jaǵdaıǵa uryndyryp júrmesine kim kepil" degen mazmundaǵy pikirler jıi aıtylady.
DEMOSCOPE qoǵamdyq pikirge jedel monıtorıń júrgizý búrosy júrgizgen "Qazaqstandyqtardyń AES qurylysy týraly pikiri" saýalnamasyna qatysýshylardyń 55%-y atom elektr stansıasynyń salynýyna qarsy ekenin aıtqan.
Pikir qaldyrý