Almatydaǵy jekemenshik balabaqshalardyń birinde tárbıeshi balalardy uryp jatqan vıdeo jelide tez taralyp, úlken rezonans týdyrdy. Atalǵan oqıǵaǵa qatysty balalardyń ata-analary pikir bildirdi. Bul týraly astanatv.kz arnasy habarlady.
Ata-analar beınebaqylaý kamerasynan tárbıeshiniń balalardy oqtaýmen uryp, shashyn tartyp, basynan toqpaqtap jatqanyn kórgen.
– Men nemeremniń sany jazda kógerip qalǵanyn kórgem. Áje: "Eshkimge aıtpaısyz ba, Lázzát apaı meni shymshyp aldy" dedi. Sandary kógerip keledi, ıyqtary kógerip keledi. Oqtaýmen urady dep aıtty. Bala ótirik aıta beredi dep nemeremdi ótirikshi qyldy, – deıdi shaǵymdanýshy ata-analardyń biri Gúlhan Ospanova.
Balabaqsha basshylyǵy oqıǵadan keıin tárbıeshi jumystan bosatylǵanyn aıtty.
– Ekinshi kategorıaly pedagog ózi. Eki jyl jumys istedi. Ata-anadan eshqandaı shaǵym bolǵan emes, bul birinshi ret tirkelip turǵan jaǵdaı. Biz shuǵyl túrde shara qoldanyp bul kisini eńbek kodeksiniń 52-baby boıynsha jumystan bosatyp otyrmyz, – dedi balabaqsha meńgerýshisi Anar Nursultanova.
Almaty qalalyq polısıa departamentiniń resmı ókili Saltanat Ázirbek atalǵan oqıǵa boıynsha Qylmystyq kodekstiń 140-baby 2-tarmaǵyna (kámeletke tolmaǵan adamǵa qatygezdik tanytý) sáıkes, tergeýge alynǵanyn málimdedi.
– Qazirgi tańda ol polısıada túsinik berýde. Tergeý barysynda qandaı bultartpaý sharasy qabyldanǵanyn sot shyǵaratyn bolady, – dedi S. Ázirbek.
Tárbıeshiniń kinási dáleldense, 3 jylǵa deıin bas bostandyǵynan aıyrylýy múmkin. Al ata-analar bul balabaqshadan balamyzdy shyǵaryp alamyz deıdi. Olar balalyq bilim basqarmasy men prokýratýraǵa da shaǵym túsirmek.
Pikir qaldyrý