Bilim jáne ǵylym mınıstrligi arnaıy komısıa Almaty qalasyndaǵy balabaqshalardyń jumysyn tekseretinin habarlady.
– Balabaqshalar 100% qaýipsiz bolý kerek. Osy kúnderi Almatydaǵy eki mektepke deıingi uıymda oryn alǵan oqıǵalarǵa jol berýge bolmaıdy. Balabaqshalar ákimdikterdiń qaramaǵynda. Zań buzýshylyqtardyń basym kópshiligi jekemenshik balabaqshalarda tirkeledi. Biraq qaýipsizdikti menshik nysany men baǵynystylyǵyna qaramastan qamtamasyz etý qajet. Ókinishke oraı, osy jyldyń qyrkúıegine deıin mektepke deıingi uıymdardyń sapasyn memlekettik baqylaý tetikteri múldem bolǵan emes. Balabaqshalar basqa bilim berý uıymdaryna qaraǵanda, lısenzıalaýdan bosatylyp, habarlama arqyly ashyldy.
Osy jyly biz balabaqshalarǵa memlekettik tekserý ınstıtýtyn zańdy túrde engize aldyq. Osyǵan baılanysty kóptegen narazylyqtar boldy. Biraq balalardyń máselesine kelgende, beıjáı qaramaý kerek. Alǵashqy nátıjeler mundaı tekserýlerdiń qajettiligin kórsetti. Jeltoqsan aıynyń basynda biz teksergen balabaqshalardyń shamamen 80%-y bilim berý qyzmetine qoıylatyn talaptarǵa sáıkes kelmeýine baılanysty memlekettik atestattaýdan ótpegenin habarladyq. Sondyqtan biz baqylaý quralyn engizdik, – dedi Bilim jáne ǵylym salasynda sapany qamtamsyz etý komıtetiniń tóraıymy Gúlzat Kóbenova.
Sondaı-aq komıtet tóraıymy jekemenshik balabaqshalarda tárbıeshilerdiń biliktiligine jáne qaýipsizdik máselelerine qoıylatyn talaptar kúsheıtiletinin atap ótti.
– Mektepter men balabaqshalarda pedagogıkalyq jumysqa alǵash kiretinderdiń biliktiligin táýelsiz tekserý týraly talap engiziledi. Balabaqshalar zańdy ákimdikterdiń qaraýynda ekenin eskere otyryp, biz mektepke deıingi uıymdardyń jumysyn erekshe baqylaýǵa alý qajettigin birneshe ret atap óttik. Ár topqa beınekameralar berilýi kerek. Balalarmen jumys isteıtin kadrlardy irikteý máselesi de óte mańyzdy, – dedi Gúlzat Kóbenova.
Pikir qaldyrý