Májilisiniń depýtaty, "Nur Otan" partıasy Fraksıasynyń múshesi Elnur Beısenbaev onlaın nesıe berý kezindegi qaýisizdik sharalaryn kúsheıtýge baılanystyr Qarjy naryǵyn retteý jáne damytý jónindegi agenttik tóraıymy Madına Ábilqasymovaǵa depýtattyq saýal joldady.

Depýtat el boıynsha onlaın-qyzmetterdiń kóbeıýine qatysty ınternet alaıaqtyq ótken jylmen (10,2 myń) salystyrǵanda 2 esege artyp, 17,8 myńnan astam iske jetkenin, bul isterdiń aıasynda 25 myń adam 8,2 mlrd teńgeden astam qarjyǵa zardap shekkenin aıtty.

Sondaı-aq ol osydan 7 aı buryn halyqqa onlaın nesıe berýmen baılanysty alaıaqtyq jaǵdaılarynyń jıilep ketkenin kóterip, arnaıy depýtattyq saýal men naqty is-sharalar tizbegin usynylǵanyna qaramastan, qabyldanǵan is-sharalar tizimi áli de, agenttik tarapynan jumys birizdi júıege qoıylmaǵanyn ańǵartatynyn atap ótti.

– Jýyrda ǵana elordalyq turǵyn ózge adamdardyń jeke qujattaryn paıdalaný arqyly Almaty, Atyraý, Nur-Sultan qalalarynyń azamattaryna, olardyń qatysýynsyz 10 mıllıon teńge onlaın-nesıe rásimdegen. Azamattardyń senimine zańgerlik kómek kórsetý arqyly kirip, olardyń jeke aqparattaryna ıe bolǵan. Odan bólek, almatylyq jas azamat Kcell telefon operatory tutynýshylarynyń atynan 2 mıllıonnan astam teńgeni quraıtyn 5 zamanaýı smartfondy onlaın rásimdegen. Bul eki mysaldyń soraqylyǵy, múddeli azamattyń qatysýynsyz, ıaǵnı onyń jeke derekterin paıdalaný arqyly nesıeniń rásimdelýinde. Ózderińizge málim, 2019 jyldan bastap kez-kelgen turǵyn óziniń SIM kartasyn JSN nómiri arqyly óz atyna tirkeý mindettelgen. Soǵan qaramastan, alaıaqtar úshinshi adamǵa ózge nómirdi qoldaný arqyly atalǵan qylmysty qınalmaı oryndap keledi. Joǵarydaǵy kórsetilgen naqty mysaldar jeke tulǵany sáıkestendirý rásimderin retteý júıeleriniń tolyq pysyqtalmaǵanyn kórsetip tur, –  degen depýtat jaýapty memlekettik organdarǵa klıenttiń sáıkestendirýin anyqtaýdy kúsheıtý bóligi boıynsha onlaın nesıeler berýdegi rásimderge qosymsha tómendegideı usynystar engizýdi suraıdy.

– Birinshiden, Agenttikke tıisti memlekettik organdarmen birlesip onlaın kredıtti rásimdeý barysyndaǵy onyń jeke derekteri men telefon nómiriniń operator jelisimen ındentıfıkasıa jasalýyn engizýdi; Sondaı-aq, tez arada barlyq mıkroqarjylyq uıymdardyń «Sáıkestendirý derekterimen almasý ortalyǵynyń» aqparatymen ıdentıfıkasıa jasaýdy uıymdastyrýdy suraımyz. Ekinshiden, kóterilgen máseleniń qaýiptiligin eskere kele, Bas prokýratýra jáne tıisti quqyq qorǵaý organdarymen birlese ınternet-alaıaqtyqty joıý boıynsha jedel áreket etý qadamdaryn uıymdastyrýdy suraımyz, – dedi ol.