Jańaózende suıytylǵan avtomobıl gazy qymbattaýyna baılanysty Mańǵystaý oblysynda ótip jatqan narazylyq sharalary sát saıyn úlkeıip barady.

Jelide taraǵan sońǵy aqparattarǵa qaraǵanda, Aqtaýda alańǵa myńdaǵan adam jınalyp, "Shal ket" dep saıası talaptar qoıa bastaǵan. Facebook-te keı qoldanýshylar alańdaǵy adam sany 10 myńnan asyp ketkenin jazyp jatyr.

Sonymen qatar azamattar úkimet otstavkasyn talap etip jatyr.

3 qańtar keshke qaraı alańdaǵy azamattarǵa oblys ákimi Nurlan Noǵaev kelip,  suıytylǵan gaz baǵasynyń qymbattaý sebebin túsindirýge tyrysty. Ol  kásipkerlermen qol jetkizilgen kelisim nátıjesinde baǵa 120 teńgeniń ornyna 85-90 teńge bolatynyn jetkizdi. Alaıda alańdaǵy adamdar ákimdi sóıletpeı "Elý! Elý!" dep aıqaılap turyp alǵan. Sondaı-aq jurt qalada ınternetti qosýdy talap etti.

Buǵan deıin narazylyqqa shyqqandar Aqtaý qalasy men áýejaıdy jalǵap jatqan joldy jaýyp tastaǵan.

Sondaı-aq Fort-SHevchenko kenti turǵyndary narazylyq aksıasyn qoldaý retinde kent pen Aqtaý arasyndaǵy joldy japqan.

2 qańtarda Jańaózende bastalǵan narazylyq aksıalary báseńdemeı, alańǵa shyǵýshylar sany sát saıyn artyp jatyr. Bılik te degeninen qaıtar emes. Olar suıytylǵan gaz quny qymbattaýy naryqtyq qarym-qatynas úshin zańdy qubylys ekenin, baǵa qaıtyp lıtri úshin 50-60 teńge deıin túspeıtinin aıtady.