Prezıdent Qasym-Jomart Toqaev elde qalyptasqan jaǵdaıǵa baılanysty  qazaqstandyqtarǵa vıdeoúndeý joldady. Vıdeony onyń baspasóz hatshysy Berik Ýálı facebook  paraqshasyna jarıalady.

"Qurmetti otandastar, qadirli aǵaıyn! Barshalaryńyzǵa taǵy da aıtarym, ishten jáne syrttan bolǵan san túrli jalǵan aqparattarǵa senip, ereýilge salynǵan toptyń qıturqy áreketteri men tártipsizdikke ermeı, parasatpen jáne aqylmen ǵana sheshim qabyldaýǵa shaqyramyn. Azamattyq jáne áskerı maqsattaǵy qyzmettik ǵımarattarǵa shabýyl jasaýǵa úndeıtin urandar múldem zańǵa qaıshy keledi. Bul – óreskel qylmystyq áreket. Bılik qulamaıdy. Biraq bizge ózara senim jáne ózara dıalog kerek", – dedi prezıdent. 

Eske sala ketsek, ekinshi qańtarda Mańǵystaý oblysynyń turǵyndary narazylyqqa shyqty. Oǵan avtokólikke quıatyn gazdyń quny lıtrine 120 teńgege deıin óskeni sebep bolǵan. Narazylyq bildirýshiler baǵany 50 teńgege deıin tómendetýdi talap etti. Arnaıy qurylǵan úkimettik komısıa belsendilermen kelissóz júrgizip, bul talap oryndalatynyn málimdedi.

Sondaı-aq Aqtóbe ákimdigi de narazylyq bildirgenderdiń eki talaby – mıtıń barysynda qamaýǵa alynǵandar bosatylyp, suıyltylǵan gaz baǵasy 50 teńgege deıin arzandatylǵanyn habarlady.

Alaıda halyq narazylyǵy basylmaı, adamdar alańnan keter emes. Kerisinshe Jańaózen men Aqtaýǵa ózge de óńirler qosylyp, el tarıhyndaǵy asa aýqymdy halyq narazylyǵy bolyp jatyr. Qazirgi ýaqytta Almatyda beıresmı derek boıynsha 40 myńdaı adam alańda júr. Narazy top saıası talaptar qoıyp jatyr. Olar júıe aýysyp, Qaýipsizdik keńesi arqyly bılikke yqpal etip otyrǵan Nursultan Nazarbaavtyń úlken saıasattan túbegeıli ketkenin qalaıdy.

Keıbir málimetterge qaraǵanda, Almatydaǵy Respýblıka alańynda birneshe polısıa kóligi órtengen. Qala ortalyǵynda granatalardyń dybysy estiledi.