Jańaózende suıytylǵan gaz qunynyń qymbattaýyna baılanysty bastalǵan halyq narazylyǵy týraly BBC, Reuters, AFP, The Guardian jáne France Press sıaqty sheteldik iri basylymdar habarlady.

"Qazaqstanda gaz baǵasynyń kóterilýine baılanysty narazylyq sherýleri zorlyq-zombylyqqa ulasyp, eldiń keıbir aımaqtarynda eki aptaǵa tótenshe jaǵdaı jarıalady" dep jazdy BBC. Sonymen qatar, eldiń birneshe aımaǵynda iri demonstrasıalar ótkenin habarlady.

"Eldiń eń úlken qalasy Almatyda kólikter órtengennen keıin polısıa jurtty aýyzdyqtaý úshin kózden jas aǵyzatyn gaz qoldandy" dep jazdy Reuters agenttigi.

France Press agenttigi seısenbige qaraǵan túni Almatyda sherýge myńdaǵan adam jınalǵanyn, qaqtyǵys kezinde tártip saqshylary jaralanǵanyn habarlady.

Al, The Guardian gazeti "Ortalyq Azıanyń avtorıtarlyq eliniń kóp bóliginde habar almasý qoldanbalary buǵattaldy jáne mobıldi ınternet óshti" dep jazdy.

"1991 jyly Keńes Odaǵy ydyraǵan tusta táýelsizdigin jarıalaǵan Qazaqstanda kelispeýshilikter men narazylyqtar sırek bolady. Alaıda, Mańǵystaý oblysy Jańaózen qalasynda 2011 jyly adam ólimine ákelgen tolqýlar boldy. Jalaqy men eńbek jaǵdaıyna baılanysty narazylyq sherýin polısıanyń basyp-janshýy kezinde kem degende 14 munaıshy qaza tapty" dep jazdy BBC.

Sheteldik basylym eks-prezıdent Nursultan Nazarbaev 2019 jyly qyzmetinen ketkenge deıin halyqty esh qıyndyqsyz basqarǵanyn jazdy. "Onyń murageri bolǵan prezıdent Toqaev 2019 jylǵy kezekten tys saılaýda halyqaralyq baqylaýshylardyń synyna ushyrady. Nazarbaev pen onyń murageri tusynda shaǵyn elıta orasan zor baılyqqa qol jetkizdi. Kóptegen qarapaıym qazaqstandyqtardyń ómiri áli de qıynshylyqta, al, eldiń batysy tabıǵı resýrstarǵa baı. Elde sırek bolatyn narazylyqtar aıaýsyz basyp tastalady, al rejımniń parlamentte shyn opozısıasy joq" delingen The Guardian gazeti taratqan aqparatta.