Ulttyq qaýipsizdik komıtetiniń baspasóz qyzmeti komıtet tóraǵasynyń birinshi orynbasary Samat Ábish qyzmetten ketpegenin málim etti.
"Kelip túsken suraýlarǵa sáıkes, QR UQK Tóraǵasynyń birinshi orynbasary S.Ábish óz qyzmetinde ekenin habarlaımyz. Qazirgi ýaqytta ol jylsaıynǵy demalysynda" delingen UQK habarlamasynda.
Buǵan deıin prezıdent ákimshiligi basshysynyń orynbasary bolyp kelgen Murat Nurtileý 5 qańtarda Ulttyq qaýipsizdik komıteti tóraǵasynyń birinshi orynbasary laýazymyna taǵaıyndalǵan. Osydan keıin Samat Ábishtiń qyzmetinen ketkeni týraly aqparattar shyqqan.
Áleýmettik jelide Samat Ábishteı ulttyq qaýipsizdikke jaýapty organ basshysynyń birinshi orynbasary elde dúrbeleń bolyp jatqanda qalaı ǵana demalysta júredi dep jatqandar bar.
Máselen, qoǵam belsendisi Muhtar Taıjan UQK taratqan aqparatqa senbeıtinin jazdy.
"El aıaqqa tik turyp, atys bolyp, adam ólip, ákimshilik órtenip, UQK departamentin basyp alyp, ishki ister departamentine shabýyl jasalyp jatqanda UQK birinshi orynbasary qalaı ǵana demalysta bolady. Óz basym bul aqparatqa sendeımin. Shamasy shyndyqty keıinirek biletin sıaqtymyz" deıdi Muhtar Taıjan.
Jibek Áshirjantegi esimdi facebook qoldanýshysy da Samat Ábish qyzmetinde bolyp, eldegi jaǵdaıda demalysta júrgenine narazy.
"Eldigimizden aıyrlyp qala jazdap, talaı beıkúná adamnyń qany tógilip, biz shar quryp izdep júrsek, myna kisi eńbek demalysta eken. Elde tótenshe jaǵdaı jarıalanyp jatqanda demalystaǵy kisini shuǵyl shaqyrtýǵa bolmaı ma? Álde demalysyna kedergi keltirýge bolmaıtynda qatty jumys istep qoıdy ma?" dep jazady ol.
Samat Ábish Qazaqstannyń burynǵy prezıdenti Nursultan Nazarbaevtyń týǵan inisi Satybaldy Nazarbaevtyń balasy.
Reseı baspasózi buǵan deıin Samat Ábish pen onyń aǵasy Qaırat Satybaldy Dýbaıda ustalǵany týraly aqparat taratqan.
