Reseı osy aptada AQSH jáne NATO-men qaýipsizdik kelissózderin «sátsiz» dep sıpattap, keıbir máseleler boıynsha kelispeýshilikterdiń jalǵasyp jatqanyn aıtty.

Kremldiń baspasóz hatshysy Dmıtrıı Peskov beısenbi kúni Jeneva men Brússelde ótken eki kelissózde ishnara kelisý bolǵanyn, biraq Máskeý naqty nátıjeler izdep jatqanyn aıtty.

Beısenbi kúni Eýropadaǵy Qaýipsizdik jáne Yntymaqtastyq Uıymynyń (EQYU) otyrysyna qatysý úshin Venaǵa kóshken kelissózderde Batystyń qaýipsizdik talaptary men Reseıdiń Ýkraına mańynda áskerlerin alyp ketýi týraly talqylandy.

Máskeýdiń áskerı ornalastyrýy Kıev pen onyń odaqtastaryn úreılendirdi. Batys reseılik kúshterdi keri qaıtarýǵa shaqyrdy jáne Reseı shabýyl jasasa, ony qatań jazalaıtyny týraly eskertý jasady.

EQYU-nyń 57 múshesiniń elshilerine sóılegen sózinde Polshanyń syrtqy ister mınıstri Zbıgnev Raý Ýkraınadaǵy, Grýzıadaǵy, Armenıadaǵy jáne Moldovadaǵy (Reseımen) shıelenisti atap ótti.

«EQYU keńistiginde mundaı soǵys qaýpi sońǵy 30 jylda buryn-sońdy bolmaǵan», - dedi Raý.

«Birneshe apta boıy biz Shyǵys Eýropada úlken áskerı shıelenistiń yqtımaldyǵyna tap boldyq», - dedi ol.

Aıta keteıik, buǵan deıin NATO Bas hatshysy Iens Stoltenberg "Eýropada jańa qarýly qaqtyǵystyń shyǵý qaýpi bar" dep málimdegeni jarıalanǵan.