Úkimet "ÓKM Operatory" JSHS-nyń (Operator ROP) qyzmetin toqtatý týraly sheshim qabyldady. Bul týraly premer-mınıstr saıty habarlady.

"ÓKM Operatory" JSHS-niń ýtılızasıalyq alymdy ákimshilendirý jáne tıisti qarajattardy basqarý sheńberindegi qyzmeti toqtatyldy. Ýtılızasıalyq alym qarajaty esebinen qurylǵan aktıvter memleket menshigine berildi.

Óndirýshilerdiń keńeıtilgen mindettemelerin, ákimshilendirý fýnksıalaryn memlekettik uıym – "Jasyl damý" AQ oryndaıtyn boldy" delingen habarlamada.

Qoǵamda ýtılalym mólsheriniń joǵary bolýyna baılanysty narazylyq kóp. Buǵan deıin ýtılızasıalyq alymdy qaıta qaraý boıynsha petısıa iske qosylǵan. Búginde oǵan 195 myńnan asa adam qol qoıǵan. 

Jýyrda prezıdent Qasym-Jomart Toqaev úkimetke ýtılızasıalyq alym stavkasyn qaıta qaraýdy jáne "Operator "ROP-tyń" qyzmetin toqtatýdy tapsyrǵan. Ashyq derekkózderde "Operator "ROP"  eks-prezıdent Nursultan Nazarbaevtyń kenje qyzy Álıa Nazarbaevaǵa tıesili ekeni aıtylady.