Iemenniń Saada qalasyndaǵy mıgranttardy ýaqytsha ustaýǵa arnalǵan blokqa áýe shabýyly jasaldy. BUU bul áýe shabýylyn aıyptady.

Iran qoldaıtyn hýsıt kóterilisshileri men Saýd Arabıasy qoldaıtyn Iemen kúshteri arasyndaǵy qaqtyǵysta kem degende 70 adam qaza tapqan.

"Kóz jumǵandardyń arasynda ondaǵan mıgrant pen dalada oınap júrgen úsh bala bar" dep habarlady quqyq qorǵaýshylar.

Eger aqparat rastalsa, bul –Iemendegi jeti jylǵa sozylǵan soǵysta beıbit turǵyndar eń kóp qaza tapqan oqıǵalardyń biri bolady.

"Save the Children" uıymynyń habarlaýynsha, áýe shabýyldary kezinde taǵy 100-den astam adam zardap shekken. 

Birikken Ulttar Uıymynyń Bas hatshysy Antonıý Gýterrısh shıelenisti toqtatý kerektigin málimdedi.

Senbi kúngi málimdemede Saýd Arabıasy bastaǵan koalısıa áýe shabýylyn jasaǵanyn joqqa shyǵardy.

Saýd Arabıasy basqaratyn koalısıa kúshteri 2015 jyldan beri hýsıt kóterilisshilerimen soǵysyp jatyr. Soǵys nátıjesinde on myńdaǵan beıbit turǵyn, sonyń ishinde 10 myńnan astam bala qaza tapqan nemese jaralanǵan.

Mıllıondaǵan adam bosqynǵa ushyrap, halyqtyń kóp bóligi asharshylyq aldynda tur.

Áýe soqqysynan birneshe saǵat ótken soń, qutqarýshylar máıitterdi úıindi astynan shyǵarýmen aınalysýda, al tiri qalǵandardy tabýǵa degen úmit azaıyp barady.

Qaıtys bolǵandardyń naqty sany belgisiz. Shekarasyz dárigerler uıymy kem degende 70 adam qaza tapqanyn, biraq olardyń sany artady dep boljanyp otyrǵanyn aıtady.