Reseıdiń qarjylyq monıtorıń boıynsha federaldyq qyzmeti saıasatker Alekseı Navalnyı men onyń jaqtastaryn terrorıster men ekstremıster reestrine qosty. Bul týraly vedomstvo saıtynda habarlandy.

Rbc.ru basylymynyń jazýynsha, tizimge engen Navalnyı jaqtastarynyń qatarynda Lúbov Sobol, Georgıı Albýrov, Vácheslav Gımadı, Rýslan Shaveddınov, Lılıa Chanysheva, Rýslan Shaveddınov, Pavel Zelenskıı bar.

Tizimge engizilgen tulǵalar men uıymdarǵa BAQ-pen qandaıda bir qarym-qatynas jasaýǵa, jelide aqparat jarıalaýǵa, kópshilik is-shara uıymdastyrýǵa, saılaýǵa qatysýǵa, salyq, jalaqy tóleý, zalaldy qaıtarýdan basqa kez kelgen qarjylyq qyzmetti qoldanýǵa tyıym salynady.

Budan bólek banktegi esepshottar buǵattalady. Reestrge tergeýdegi adamdar da, jazasyn ótep jatqandar da engizile beredi.

Buǵan deıin Reseıdiń tergeý komıteti Alekseı Navalnyı men Leonıd Volkov, Ivan Jdanovty ekstremıstik qaýymdastyq quryp, ony basqardy dep aıyptaǵan. Qazirgi ýaqytta Navalnyı "Iv Roshe" kompanıasynyń qarjysyn jymqyrdy degen aıyppen túrmede jazasyn ótep jatyr. Ol 2021 jylǵy 2 aqpanda 2 jyl 8 aıǵa sottalǵan.

Alekseı Navalnyı tizimdegi ulttyq bóliktegi jeke tulǵalar pýnktinde 7504 bolyp tur. Bul tizimde jalpy 11751 adam bar.