"Samuryq-Qazyna" UÁQ qordyń jeti top-menedjeriniń jumystan bosatylǵanyn habarlady. Bul týraly qordyń baspasóz qyzmeti málimdedi.

"Memleket basshysy tapsyrmalaryn iske asyrý boıynsha İs-sharalar josparyna sáıkes, jazǵan aryzdarynyń negizinde búgin qyzmetinen bosatyldy:

Kravchenko Andreı Nıkolaevıch – Quqyqtyq súıemeldeý jáne táýekelder jónindegi basqarýshy dırektor – "Samuryq-Qazyna" AQ Basqarma múshesi.

Mankeev Muhtar Naýryzbaıuly – "Samuryq-Qazyna" AQ Korporatıvtik basqarý jáne áleýmettik-eńbek qatynastary jónindegi basqarýshy dırektor.

Dýrmagambetov Erlan Dmıtrıevıch – "Samuryq-Qazyna" AQ Strategıa, turaqty damý jáne sıfrlyq transformasıa jónindegi basqarýshy dırektor.

Tajıgalıev Muhtar Ótepqalıuly – "Samuryq-Qazyna" AQ Aktıvterdi basqarý jónindegi teń-basqarýshy dırektor.

Espolov Bektenbaı Tlektesuly – "Samuryq-Qazyna" AQ Qoǵam jáne Úkimetpen baılanys jónindegi seriktes basqarýshy dırektory.

Týsýpbekov Jannat Rashıduly – "Birikken hımıalyq kompanıa" JSHS Basqarma tóraǵasy.

Kojakov Qýat Asqarbekuly – "Samruk-Kazyna Trust" KQ Bas dırektory" delingen habarlamada.

Qordyń habarlaýynsha, portfeldik kompanıalarǵa korporatıvtik ortalyq qyzmetkerleriniń sanyn zań talaptaryna sáıkes eki ese qysqartyp, óndiristik qyzmetkerlerdiń jalaqysyn alǵashqy kezeńde ortasha salalyq kórsetkishterge deıin kóterý týraly keńes berildi.

"Portfeldik kompanıalarǵa satyp alýlarǵa jaýapty barlyq basshylardy zań talaptaryna sáıkes qyzmetinen bosatyp, Qor tobyna repýtasıalyq ári jemqorlyq qaýip tóndiretin barlyq qyzmetkerlerdi  jumystan bosatý týraly keńes berildi.

Portfeldik kompanıalar birqatar qyzmetkerlerdi qysqartatynyn jetkizdi  ("QazMunaıGaz" UK" AQ – 78 adam, "Qazatomprom" UAK" UQ – 46 adam, "Qazaqstan Temir Joly" UK" AQ - 32 adam jáne basqalar)" delingen qor taratqan aqparatta.

Keshe Samuryq-Qazyna" qyzmetkerleriniń jartysy qysqartylatyny habarlanǵan.

21 qańtarda prezıdent Qasym-Jomart Toqaev Qazaqstannyń iri bıznesmenderimen kezdesýinde "Samuryq-Qazyna" qory jumysyn ashyq júrgizbeıtinin, satyp alýlar júıesi tıimsiz ekenin aıtqan. Memleket basshysy óz sózinde aýqymdy jobalar aıaǵyna deıin jetkizilmeı jatqanyn atap ótip, qorǵa túbegeıli reforma jasaýdy tapsyrǵan. Atalǵan másele boıynsha prezıdent Almasadam Sátqalıevpen sóıleskenin, eger ol júktelgen mindetti atqara almasa, ózi de, Qor da birge ketetinin málimdegen.