1986 jylǵy Jeltoqsan oqıǵasyna qatysýshylar qańtarda beıbit mıtıńige shyqqan qamaýdaǵy barlyq azamattardy bosatýdy talap etti. Úndeýdiń vıdeosy Facebook jelisinde jarıalandy.  

Jeltoqsanshylar osydan 35 jyl buryn qyzyl ımperıanyń solaqaı saıasatyna qarsy shyqqan jastardyń qatarynda bolǵany aıtady. Sózderinshe, ishki ister mınıstrligi men UQK 1986 jyly da ókilettigin asyra paıdalanyp, "neshe túrli áreketter oılastyryp", istelmegen qylmysty beıbit jastardyń moınyna ilgen.

"Bizge ultshyldar, nashaqorlar, maskúnemder, buzaqylar dep jala jaýyp, dúnıejúzine masqaralap, aldyn atý jazasyna kesip, keıingilerdi 10-15 jylǵa sottady", - delingen úndeýde.

Belsendiler Qańtar oqıǵasy kezinde beıbit sherýge shyqqandar jazyqsyz jazalanyp, túrmege qamalyp jatqanyn málimdedi.

"Túrmede olardy azaptap, zorlyq-zombylyq kórsetip, istemegen qylmysty moınyna ilip otyr. Bul jóninde búkil álem aıtyp jatyr. Quzyrly organ qyzmetkerleri óz ókilettigin asyra paıdalanýda. Tipti túrli jaraqatpen aýrýhanada jatqan naýqastardy alyp shyǵyp, kúsh qoldanyp, kiná taǵýda. Ol eshqandaı adamgershilikke jatpaıdy. Búgingi kúni Qańtar kóterilisine qatysqan jastarǵa qarsy qoldanylyp jatqan aıýandyq áreketter 1986 jylǵy repressıadan 100 ese asyp ketti. Elim, jerim dep beıbit sherýge shyqqan halyq eshqandaı terrorıst emes. Biz, Jeltoqsan ardagerleri elimizdiń túrmelerinde bolyp jatqan aıýandyqty shuǵyl túrde toqtatyp, olardy bostandyqqa shyǵarýdy talap etemiz", - dep málimdedi olar.