Májilis otyrysynda "Aq jol" fraksıasynyń atynan depýtat Maqsat Ramanqulov de-ofshorızasıa máselesin kóterip Qarjy monıtorıń agenttiginiń tóraǵasy Jannat Elımanovqa depýtattyq saýal joldady.

Depýtat "Tax Justice network" halyqaralyq uıymynyń málimeti boıynsha, sońǵy 25 jylda Qazaqstannan sheteldik ofshorlarǵa shamamen 140-160 mıllıard AQSH dollary shyǵarylǵan, bul búkil eldiń jyldyq ishki jalpy ónimi men onyń syrtqy qaryzyna teń ekenin aıtady.

– Keıbir málimetterge sáıkes, sońǵy bes jylda Qazaqstan Respýblıkasynyń quqyq qorǵaý organdary qarajatty shetelge zańsyz shyǵarý faktileri boıynsha eki júzden astam is qozǵaǵan.  Alaıda, naqty nátıjeleri týraly eshteńe belgisiz. Sonymen qatar, Qańtar qasiretinde keıbir olıgarhtar Qazaqstannan jeke ushaqtarmen ketip qana qoımaı, qyrýar qarjyny sheteldegi esepshottarǵa aýdarǵan týraly resmı emes aqparat bar, – deıdi ol.

Maqsat Ramanqulov "Aq jol"  fraksıasy Qarjy monıtorıńi agenttiginen tómendegideı máseleler boıynsha málimet berýdi surap, naqty qadamdar jasaýǵa shaqyrdy:

1) Agenttik qurylǵannan beri Qazaqstan ekonomıkasyna ofshorlyq aımaqtardan naqty qansha qarajat qaıtarylǵan týraly aqparat berý.

2) Qańtardaǵy qaıǵyly oqıǵalar kezinde Qazaqstannan shetelge kandaı iri qarajat shaǵaryldy (mıllıon AQSH dollardan kóp sýmmalar), ony kimder shyǵardy, kimderdin shottaryna tústi.

Sol kúrdeli kúnderde kóleńkeli kapıtaldar shyǵaryldy, degen kúmánimiz bar. Ol adamdar taǵdyryn elimizben baılanystyrmasa, qalaǵan jerde qala bersyn. Biraq shyǵarylǵan qarajat halyqtan urlanǵan bolsa, elimizge qaıtarylyp, ekonomıkaǵa jumys istesin.

3) Sondyqtan bundaı faktiler bolǵan jaǵdaıda, salyq organdarynan mundaı qarjynyn shyǵýynyń zańdylyǵyn jáne olardyń tıisti salyqtardy tólegenin tekserýin suraımyz.