Májilis eks-prezıdent Nursultan Nazarbaevty eldegi saıasatty júrgizýge aralasýyn shekteıtin normalardy maquldady.

Májilistiń búgingi otyrysynda "Qazaqstan Respýblıkasynyń keıbir konstıtýsıalyq zańdaryna ózgerister men tolyqtyrýlar engizý týraly" konstıtýsıalyq zańyna senat engizgen jobalar maquldandy.

Engizilgen ózgeriske saı, memlekettik bastamalardy Nazarbaevpen aqyldasýdy alyp tastaý zańnamalyq turǵydan retteldi.

Ózgeris qujatqa prezıdent qol qoıǵan kúnnen bastap kúshine enedi.

Sondaı-aq májilis "Qazaqstan halqy Assambleıasy týraly", "Qaýipsizdi keńesi týraly" zańdarǵa ózgerister men tolyqtyrýlar engizgen. Ózgeriske saı, májilis Qazaqstannyń eks-prezıdenti Nursultan Nazarbaevqa QHA men Qaýipsizdik keńesin ómir boıyna basqarýǵa quqyq beretin normalardy alyp tastady.

Qazirgi ýaqytta Nursultan Nazarbaevta bılikke yqpal ete alatyndaı eshqandaı zańdyq tetik qalǵan joq. Tek onyń jáne otbasy músheleriniń qaýipsizdigin qamtamasyz etetin, qabyldaǵan sheshimderi úshin jaýapkershilikten bosatatyn "Qazaqstan Respýblıkasynyń Tuńǵysh Prezıdenti - Elbasy týraly" zań ózgerissiz tur.

Zańǵa sáıkes Qazaqstannyń burynǵy prezıdenti Nursultan Nazarbaevqa aıryqsha quzyretter men kepildikter berilgen.

Máselen, zańǵa sáıkes N.Nazarbaev aıryqsha erekshelik belgisi - Altyn juldyz jáne "Otan" ordenine, "Halyq qaharmany" (Narodnyı geroı) ataǵyna ıe.

♦ Qazaqstan Respýblıkasy Tuńǵysh Prezıdentiniń – Elbasynyń zańdy qyzmetine kedergi jasaýǵa, Qazaqstan Respýblıkasy Tuńǵysh Prezıdentin - Elbasyn kópshilik aldynda qorlaýǵa nemese onyń abyroıy men qadir-qasıetine ózgedeı qol suǵýǵa, sondaı-aq Qazaqstan Respýblıkasy Tuńǵysh Prezıdentiniń – Elbasynyń beınesin búldirýge jol berilmeıdi jáne ondaı áreketter zańmen qýdalanady.

♦ Qazaqstan Respýblıkasynyń Tuńǵysh Prezıdentine – Elbasyna eshkimniń tıisýine bolmaıdy. Ol ózi Qazaqstan Respýblıkasy Prezıdentiniń ókilettikterin oryndaý kezeńinde jasaǵan, al bular toqtatylǵannan keıin Qazaqstan Respýblıkasynyń Tuńǵysh Prezıdenti – Elbasy degen óz mártebesin júzege asyrýǵa baılanysty áreketteri úshin jaýaptylyqqa tartylmaıdy. Ony ustap alýǵa, qamaqqa alýǵa jáne kúzetpen ustaýǵa, tintýge, odan jaýap alýǵa ne jeke basyn jete tekserýge bolmaıdy.

Tıispeýshilik Qazaqstan Respýblıkasynyń Tuńǵysh Prezıdentine – Elbasyna jáne onymen birge turatyn otbasy múshelerine jeke menshik quqyǵymen tıesili barlyq múlikke, sondaı-aq olar paıdalanatyn turǵyn jáne qyzmettik úı-jaılarǵa, qyzmettik kólikke, baılanys quraldaryna, jazysqan hattaryna, olarǵa tıesili qujattarǵa qoldanylady. Tıispeýshilik Qazaqstan Respýblıkasy Tuńǵysh Prezıdentiniń – Elbasynyń qoryna jáne ol quratyn ózge de zańdy tulǵalarǵa tıesili múlikke de qoldanylady.

♦ Qazaqstan Respýblıkasynyń Tuńǵysh Prezıdentine – Elbasyna jáne onymen birge turatyn otbasy múshelerine jeke menshik quqyǵymen tıesili múlikke, sondaı-aq ol quratyn zańdy tulǵalardyń múlkine qandaı da bir shekteýler qoıylmaıdy.

Qazaqstan Respýblıkasy Tuńǵysh Prezıdentiniń – Elbasynyń jáne onymen birge turatyn otbasy músheleriniń banktik shottarynyń banktik qupıalyǵyna jáne olarǵa tıispeýshilikke kepildik beriledi.