Taldyqorǵanda Qazaqstannyń eks-prezıdenti Nursultan Nazarbaevtyń eskertkishin qulatqandprdyń biri delingen Azamat Batyrbaevty azaptaý isi boıynsha tergeý sharalary bastaldy. Bul týraly "Qamshyǵa" onyń advokaty Baýyrjan Azanov málimdedi.
Advokattyń sózinshe, Azamat Batyrbekov azaptaý kezindegi denesine keltirilgen jaraqattarǵa qaramastan aýrýhanada emes, tergeý ızolátorynda.
– Qazir onyń densaýlyq jaǵdaıy ortasha qanaǵattanarlyq dep baǵalanyp otyr. Azaptaý faktisi boıynsha tergeý bastaldy, – dedi ol.
Azamat Batyrbekovke qylmystyq kodekstiń 272-baby (jappaı tártipsizdikter) boıynsha aıyp taǵylǵan. Ol bultarpaý sharasy retinde eki aıǵa qamaýǵa alynǵan.
Búgin bas prokýratýra da Batyrbaevty azaptaý faktisine baılanysty málimdeme jarıalaǵan.
"2022 jyldyń 22 qańtarynda Taldyqorǵandaǵy tártipsizdikter kezinde quqyq qorǵaý organdary qyzmetkerlerine shabýyl jasaǵany úshin ustaldy.
2022 jyldyń 23 qańtary jaýap alý kezinde ol ishki ister organdarynyń qyzmetkerleri 10 qańtarda denesine jaraqat keltirgenin kórsetken.
A. Batyrbaevtyń osy aryzy negizinde Almaty oblysynyń sybaılas jemqorlyqqa qarsy qyzmeti azaptaý faktisi boıynsha qylmystyq is qozǵady. Qazir tergeý amaldary júrgizilýde" delingen Bas prokýratýra taratqan habarlamada.
Buǵan deıin áleýmettik jelide Batyrbaev Qańtar oqıǵasy kezinde eks-prezıdent Nursultan Nazarbaevtyń Taldyqorǵandaǵy eskertkishin buzýǵa qatysqandardyń qatarynda bolǵany jáne tergeý barysynda kúrdeli azaptaýlarǵa ushyraǵany týraly aqparat jarıalanǵan bolatyn. Alaıda onyń jaqyndary Batyrbaevtyń eskertkishti qulatý oqıǵasyna qatysy joq ekenin aıtady.
Pikir qaldyrý