Mańǵystaý oblysy polısıa departamentiniń bastyǵy qyzmetine Aıan Dúısembaev taǵaıyndaldy. Bul týraly polisia.kz saıty habarlady.

Buǵan deıin atalǵan qyzmette Janarbek Baqtybaev bolǵan. 

Polısıa departamentiniń jańa basshysyn İshki ister mınıstriniń orynbasary Murat Baımuqashev tanystyrdy.

Aıan Sábıtuly Dúısembaev 1966 jyly Atyraý oblysynda dúnıege kelgen. Ál-Farabı atyndaǵy Qazaq memlekettik ýnıversıtetin bitirgen.

İshki ister organdarynda 1999 jyldan bastap qyzmet atqaryp keledi. 2012 jyldan bastap Atyraý oblysy İshki ister departamenti bastyǵynyń birinshi orynbasary, 2016-2019 jyldary oblystyń ishki ister departamenttiń bastyǵy qyzmetterin atqarǵan. 2019-2021 jyldary Mańǵystaý oblysy ákiminiń keńesshisi bolyp jumys istedi. Jańa laýazymyna deıin TJM órtke qarsy qyzmet komıteti tóraǵasynyń orynbasary qyzmetin atqardy. Polısıa general-maıory.

Aıan Dúısembaev 2019 jylǵy mamyrda Atyraý oblysynyń polısıa departamentin basqaryp turǵanda daýly oqıǵaǵa tap bolyp, qyzmetinen bosatylǵan. Oǵan kezekti shen berilgennen keıin týǵan jeri – Atyraý oblysy Qyzylqoǵa aýdanda jerlesteri oǵan at mingizgen. Uzamaı áleýmettik jelide qyzmettik kıimdegi Aıan Dúısembaevtyń jylqymen oıqastap turǵan vıdeosy tarap, qyzý talqylandy. Artynsha prezıdent Qasym-Jomart Toqaev ishki ister mınıstri Erlan Turǵymbaevqa beıne jazbadaǵy keıipkerdiń "ersi qylyǵyna" qatysty qyzmettik tekseris júrgizýdi tapsyrǵan. Tekseris nátıjeleri boıynsha ishki ister mınıstri Dúısembaevty "Qyzmettik etıkany buzǵany úshin" qyzmetinen bosatqan.