Jambyl oblysy ákiminiń orynbasary bolyp Nurjan Kalenderov taǵaıyndaldy. Bul týraly oblys ákimdiginiń baspasóz qyzmeti málimdedi.

Nurjan Kalenderov 1976 jyly týǵan. Jambyl jeńil jáne tamaq ónerkásibi tehnologıalyq ınstıtýtyn "halyqaralyq ekonomıkalyq qatynastar" mamandyǵy boıynsha bitirgen.

Eńbek jolyn 1997 jyly "Arnabol" jaýapkershiligi shekteýli seriktestiginiń býhgalteri bolyp bastaǵan.

Ár jyldary zeınetaqy tóleý jónindegi memlekettik ortalyǵynyń Taraz qalalyq bólimshesinde aǵa maman, Jambyl oblystyq bólimshesinde bas maman, Jambyl oblysy ákimi apparatynyń bas mamany, oblys ákimdiginiń qarjy basqarmasynda bólim bastyǵy, basqarma basshysynyń orynbasary, basqarma basshysy bolyp eńbek etken.

2011-2013 jyldary Jambyl aýdanynyń ákimi, 2013 jyldyń maýsym-jeltoqsan aralyǵy Qordaı aýdanynyń ákimi, 2013-2017 jyldary Taraz qalasynyń ákimi, 2017-2019 jyldary Jambyl oblysy ákimi apparatynyń basshysy, 2019-2020 jyldary oblys ákiminiń orynbasary qyzmetterin atqarǵan.

2020 jyldyń maýsymynan beri Shý aýdanynyń ákimi bolyp keldi.