Otyrysta Erlan Qoshanov májilistegi «Nur Otan» fraksıasynyń jetekshisi bolyp saılandy.

Májilis spıkeriniń kandıdatýrasyn vıse-spıker Pavel Kazansev usynyp, depýtattar biraýyzdan qoldady.

Óz kezeginde palata spıkeri depýtattarǵa fraksıa jetekshisi retinde qoldaǵandary úshin alǵys bildirdi. Erlan Qoshanov fraksıa jumysyn jańa deńgeıge kóteretinin aıtyp, memleket basshysy, «Nur Otan» partıasynyń tóraǵasy Qasym-Jomart Toqaevtyń 2022 jylǵy 28 qańtardaǵy «Nur Otan» partıasynyń kezekten tys XXI sezinde fraksıa jumysyn qaıta bastaý týraly tapsyrmasyna erekshe nazar aýdardy.

Fraksıa basshysy óz sózinde partıa tóraǵasy qoıǵan jeti basym baǵytty atap, fraksıaǵa túbegeıli reforma jasap, qaıta qurý qajettigine nazar aýdardy. Palata tóraǵasy barlyq depýtat senim mandatyn alyp, kópshilik depýtattar praımerız arqyly ótip, óńirlerdiń tirshiligin jaqsy biletinin alǵa tartty. Sonymen qatar bul aımaqtardaǵy ózekti máselelerdi der kezinde sheshýge múmkindik beretinine toqtaldy.

Otyrysta májilis spıkeri fraksıa aldynda turǵan jańa mindetterdi eskere otyryp, zań jobalaý qyzmetiniń sapasyn arttyrý, depýtattyq saýaldardyń ózektiligin arttyrý, taldaý jáne óńirlerdegi jumys máseleleri boıynsha partıanyń Ortalyq apparatymen ózara is-qımyldy kúsheıtýdi tapsyryp, fraksıa depýtattary aqparattyq jumysqa, onyń ishinde áleýmettik jelilerge de basa nazar aýdarýy kerek ekenin aıtty.

Májilis tóraǵasy aǵymdaǵy jyldyń aqpan aıynda depýtattardyń óńirlerge shyǵýyna baılanysty fraksıa múshelerine birqatar tapsyrmalar júktedi.

Aldaǵy jumystardyń mańyzdylyǵyn atap ótken Erlan Qoshanov turǵyndarmen kezdesý azamattardyń naqty máselelerin jergilikti jerde talqylaý arqyly ótý kerektigin eske saldy. Palata spıkeriniń aıtýynsha, depýtattardyń halyqpen kezdesýleri tek ortalyqtarmen, qalalarmen ǵana shektelmeı, shalǵaıdaǵy eldi mekenderde, aýyldarda ótýi tıis. Onyń ishinde jastarǵa memleket tarapynan kórsetiletin qoldaýlar jaıynda túsindirip,  erekshe kóńil adarý qajet ekenin jetkizdi.  Sondaı-aq Erlan Qoshanov issaparlar barysynda depýtattar qoǵamdyq keńes múshelermen kezdesýler ótkizip, partıanyń qoǵamdyq qabyldaý bólimderinde azamattardy qabyldap, olardyń shynaıy máselelerin kóterýi kerek ekenin aıtty.

Otyrys barysynda jańa mindetterdi eskere otyryp, májilismender fraksıanyń sapalyq quramyna ózgerister engizdi. Atap aıtqanda, májilis depýtaty Erlan Saırov fraksıa tóraǵasynyń orynbasary jáne prezıdıým múshesi, al májilis depýtattary Elnur Beısenbaev pen Ekaterına Smyshláeva fraksıa tóralqasynyń múshesi bolyp saılandy.

Sonymen qatar, fraksıa otyrysyna «Nur Otan» partıasynyń Atqarýshy hatshysy Asqat Oralov qatysty.

Májilistiń baspasóz qyzmeti