Qanat Sharlapaev Qazaqstannyń damý banki (QDB) dırektorlar keńesi tóraǵasynyń mindetin atqarýshy bolyp taǵaıyndaldy, dep habarlady KazTAG aqparat agenttigi.

"2022 jylǵy 9 aqpanda Qazaqstan damý banki dırektorlar keńesiniń quramynan basqarma tóraǵasy A.A. Áriphanov alynyp, onyń ornyna Q. B. Sharlapaev saılandy" delingen habarlamada.

Sharlapaev 2 aqpanda "Báıterek" ulttyq basqarýshy holdıńine basshylyqqa kelgen. Keıinirek ol 2016 jylǵy qarashada Reseıde sybaılas jemqorlyq qylmysy úshin sottalǵan Saratov oblysy Marksov aýdany jıynynyń depýtaty Bısimbaı Sharlapaevtyń uly ekeni belgili boldy. 

Reseıdiń Saratov oblysynyń týmasy Qanat Sharlapaev 2020 jyldan bastap 2022 jylǵy qańtardyń sońyna deıin "Sıtı" ınvestbankiniń (OAE) Afrıka, Taıaý Shyǵys jáne Shyǵys Eýropa damýshy naryqtarynnyń strategıa, josparlaý jáne taldaý jónindegi aımaqtyq dırektory bolǵan.

2017-2020 jyldary "Sıtıbank Reseıdiń" Reseı, Ýkraına jáne Qazaqstan boıynsha bas qarjy dırektory, aǵa vıse-prezıdenti bolǵan.

Onyń aldynda 2015-2017 jyldary "Sıtıbank Kazaqstannyń" bas qarjy dırektory, basqarma tóraǵasynyń orynbasary, aǵa vıse-prezıdenti bolǵan.

Eske sala keteıik, 11 qańtarda prezıdent Qasym-Jomart Toqaev "Qazaqstannyń Damý Banki is júzinde qarjy-ónerkásiptik jáne qurylys toptary ókilderiniń shaǵyn toby úshin jeke bankke aınaldy" dep málimdegen. 25 aqpanda Abaı Sarkýlovtyń QDB-nyń basshysy retindegi ókilettigi merziminen buryn toqtatylǵan.