Sońǵy jyldary Qazaqstanda úı kezeginde turǵandar sany edáýir artyp,  591 myńǵa jetken. Mundaı derekti májilis depýtaty Elnur Beısenbaev premer-mınıstr Á.Smaıylovqa joldaǵan saýalynda málim etti.

Depýtat qalyptasqan ahýaldy eskerip, úkimetten naqty sheshimder tizbegin qarastyrýdy suraıdy.

– 2018 jyldan beri kezekte turǵan adamdardyń tizimi shamamen 130 myńǵa kóbeıip, 591 myń tirkelýshini qurap otyr. Onyń ishinde, olardyń sany Shymkentte 14 myńǵa ósip 48 442 adam bolsa, Almaty oblysyndaǵy úı kezegin kútýshilerdiń sany 17 myńǵa ósip 59 067 jetti, al Túrkistandyq kezektegi san 19 myńǵa artyp, 47 409 otbasyny qurap otyr. Bul sıfrlar tek ósýmen álek bolsa, páter jaldaǵan otbasylar kóshýmen álek. Memleket basshysy 2020 jyldyń basyna deıin "Baqytty otbasy" baǵdarlamasynyń aýqymyn keńeıtýdi tapsyrǵan bolatyn. Al Úkimet bolsa, tek qarjyny ulǵaıtýmen shekteldi. Osy oraıda, áleýmettik osal toptarǵa kiretin jetimder men múgedekter sanaty qaıta syrtta qalyp qoıdy. Sonymen qatar, 2022 jyldyń ekinshi aıy bastalǵanymen "Shańyraq" baǵdarlamasyna arnalǵan qarjy áli ortaq operatorǵa úılestirilmegen. Úkimet úshin bir aı ýaqyt emes shyǵar, al páter jaldaýshy úısiz otandasymyzǵa bul kezekti dalaǵa ketken páteraqysynyń somasy, – dedi ol.

Depýtat kóterilgen máseleler, elidegi turǵyn úımen qamtamasyz etý máseleleriniń álsiz, ári tıimsiz iske asyrylyp kele jatqandyǵyn ańǵartyp otyrǵanyn atap ótti.

– Osyǵan oraı, úkimet tarapynan daıarlanyp jatqan "Turǵyn úı saıasaty" týraly zańnamanyń jobasyna sońǵy oryn alǵan oqıǵalardy eskere kele, naqty sheshimder tizbegin qarastyrýdy suraımyz. Onyń ishinde sýbsıdıalaý mehanızmderine baılanysty qoǵam pikirine qulaq asýdy suraımyz, – dedi depýtat.